Japan ramah naupiang tlahniam zui zel

Japan population chu a prefecture 47 ah a tum khat nan a tlahniam vek a, chutih laiin foreign mi an rama chengte pung nasa thungin maktaduai thum vel lai an ni tiin sorkarin data a tihchhuahah tarlan niin hei hian Japan ramah non-Japanese te an tam tial tial dan a tarlang anga ngaih a ni bawk.
Japan population chu kum 2022 nena khaikhinin 8,00,000 velin a tlahniam a, kum 14 zet population a zawn zatin a tlahniam tawh tiin Internal Affairs and Communications Ministry chuan a tarlang.
Japan ppopulation chu 125.41 million niin a hma kum aiin tlahniam nasa tak niin chutih rualin foreign mite punna erawh 10.7% lai a ni tiin Ministry chuan a tarlang thung.
Japan-ah hian ministry-in statistics kum 2013 atanga a lakkhawm tan hnuah Japan-a foreign population chuan pun lam a pan tial tial a, tunah chuan Japan population pum atangin 2.4% lawih an hauh tawh tiin Internal Affairs and Communications Ministry chuan a tarlang bawk a.
Kum 2008 hnu atang khan Japan population chu a tlahniam char char a, naupiang an tlem tial tial a, nikum khan naupiang 7,71,801 chauh an awm.
Prime Minister Fumio Kishida chuan naupiang tlahniam zel beih let chu policy goal bera a neih niin hei vang hian new child care package tih siamin chutah chuan kum thum chhungin $25.2 billion sen tur a ti a, hemi hmang hian naupangte enkawlna lamah allowances pek te leh zirna sang zawk an kalpuina turah subsidy pek te pawh tel a ni.
Kishida Cabinet chuan thla kalta khan foreign workers tena hna an thawh theihna tizauin leh permanent residency an neih theihna tur kawng a hawng bawk a, hei hi population tlahniamin a hrin kal zel a ni.