Japanese embassy mi kawm

MPCC vice president Lalnunmawia Chuaungo leh Japanese Embassy-in Mizorama a tirh, Ministry of Foreign Affairs of Japan diplomat Orita Kentaro chu September 15 khan Aizawlah an inkawm.
Japanese palai chuan an ram embasssy-in Mizoram zirchiang tura a tirh a nih thu leh Japan embassy atanga Mizoram zirchiang tura tirh hmasak ber a nih thu a sawi a. Japan chuan India hmarchhak a ngaihven takzet a, investment pawh a ti nasa tih a sawi.
Japan-ah thalai hna thawk tur an duh a, hna a tam em em tih Orita Kentaro hian a sawi a. A bikin caretaker an mamawh a; agriculture, hospitality leh construction lamah pawh hnathawk tur an mamawh tih a sawi a ni.
MPCC vice president chuan Mizoramah thalai tha leh thiam tak tak, Japan-a hna thawk thei tur an tam a. Chutihlaiin, ngaihpawimawh hmasak ngai chu heng hnathawktute himna hi a ni, tiin, “Tunhnaiah kan thalai ram danga hna thawka awm ten harsatna an tawk chamchi a, hei hi kan duh lo. Agency rintlak, Japan sawrkarin a pawmpui thlap an awm ngei tur a ni. Diklo taka inbumna a tam a, embassy-in rintlak a tihte nen chuan thawhho theih a ni,” tiin a sawi.
Japan palai chuan agency tha leh training pawh tha taka pe thei an an awm tih sawiin, hma lak zui zel dan tur ngaihtuah nise, a ti.