Jason Aldean ‘Try That in a Small Town’ a Hot ber
ason Aldean hla hit ‘Try That in a Small Town’ chu Billboard Hot 100 (singles) chart-ah a No.1 a, he chart-a a hla No.1 kai thei hmasa ber a ni. Hetihrual hian Morgan Wallen hla, he chart-a No.1 lo ni reng tawh ‘Last Night’ chu No.2 niin, Luke Combs ‘Fast Car’ chu No.3 a ni bawk a, Hot 100 chart history chart No.1 atanga No.3 thleng tum khata country hla an intlar vawi khatna a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘Try That in a Small Town’ hi kar khat chhungin US-ah stream maktaduai 30.7 tlingin, radio airplay-ah pawh ngaithlatu maktaduai 8.8 nei angin an chhuta, sales 1,75,000 a tling bawk a, hei hi Hot 100 chart-ah a No.1 pui ta a ni. He hla hi kar kalta chart-ah khan No.2 a ni a, tunkarah No.1-ah a invawrh ta a ni.
He hla hi a music video July ni 14 khan an tichhuak a, CMT-in a video hi ni thum an tihchhuah hnuah a chhan sawi lem lovin an hnuk kir ta daih a ni. He video-ah hian American an hal alh lai te, mipui leh police innawr lai ta, misualin dawr an rawk lai te pawh a lang. He hla hi sawiseltu an tam nghal hle a, tharum thawhna a support tih te, chi inthliarna lam rawngkai a ni ti a sawi te pawh an awm.
Zaithiam lar zingah pawh sawiseltu an kat nuk a, chutihrualin a tantu pawh an tam tho. Hetiang boruak avang hian a hlain a lar phah ta hlauh a, country fans lamin Aldean an support-na an tilang ve leh ta a ni.
Aldean hian he chart-a lang thei hla 40 a nei tawh a, mahse, No.1-ah chuan tun hi a lan vawi khatna a ni. Chart-a a lanna hmasa ber chu August 2005 daih tawh kha a ni. July 2011 khan a hla ‘Dirt Road Anthem’ chu No.7 a kai a, tunah No.1 kai thei hla nei lehin, chart top 10-a a lan vawi hnihna a ni.
Hot 100 chart-ah hian No.1 kai thei hla 1,152 a awm tawh a, chung zingah hla 21 chiah chu country hla a ni a, chung zingah hla 12 chu 1973-83 inkara mi niin, country hla he chart-a No.1 kai thei pakhat aia tam nei thei pawh zaithiam panga- Glem Campbell, John Denver, Dolly Parton, Kenny Rogers leh Taylor Swift te chiah an ni bawk.
Chart No.1 hlui, he chart-a kar 14 chhung No.1 thei, Morgan Wallen ‘Last Night’ chu No.3 atangin No.2 a kai thar leh a, Luke Combs-a’n Tracy Chapman hla hlui a cover ‘Fast Car’ chu No.4 atangin No.3 a kai thar ve leh ta bawk. Tihian chart No.1 atanga No.3 thleng hian country hla vek a ni a, Hot 100 history-ah hetiang hi a thlen vawi khatna a ni.
Gunna ‘Fukumean’ chu No.6 atangin No.4-ah a insawn a, Rema leh Selena Gomez ‘Calm Down’ chu No.5-ah bawk awm lehin, Taylor Swift ‘Cruel Summer’ chu No.8 atangin No.6-ah a insawn ve leh ta bawk.
Travis Scott, Bad Bunny leh The Weeknd ‘K-POP’ chu stream maktaduai 19.4, radio airplay maktaduai 10.6 leh sales 35,000 tlingin, No.7-ah a debut a, Travis Scott tan he chart top 10-a lang thei hla 12 a neihna niin, Bad Bunny tan a 11-na a ni a, The Weeknd tan a 17-na a ni ve thung. He hla hi Scott album thar ‘Utopia’ atanga single a ni.
Nicki Minaj leh Ice Spice tebn Aqua an thawhpuina ‘Barbie World’ chuan stream maktaduai 23.2, radio airplay maktaduai 13.6 leh sales 6,000 tlingin No.27 atangin No.8-ah a invawrh a, he hla hi movie thar Barbie soundtrack a ni.
Chart No.1 hlui Jung Kook ‘Seven’ featuring Latto chu No.9-ah a tawlh a, chart No.1 hlui bawk Olivia Rodrigo ‘Vampire’ chu No.7 atangin No.10-ah a tawlh ve ta bawk.