‘Jesus, Take the Wheels’ phuahtu thlawhtheihna chesualah thi

‘Jesus, Take the Wheels’ phuahtu thlawhtheihna chesualah thi
Grammy pawh dawng tawh, hlaphuah thiam, Carrie Underwood hla sak lar ‘Jesus, Take the Wheels’ tih hla phuahtu Brett James, kum 57, chu September ni 18 khan thlawhtheihna chesualah a thi. Brett chuanna thlawhtheihna tê chi, Cirrus SR22T hi North Carolina-ah tlain, hmeichhe pahnih Melody Carole leh Meryl Maxwell Wilson te pawhin nunna an chan.
Federal Aviation Association (FAA) leh National Transport Safety Board (NTSB) te chuan thlawhtheihna tlakna chhan hi chhui a nih tur thu an puang. Thlawhtheihna hi Nashville-a John C Tune Airport atanga tlawhchhuak niin, a thlawh chhuahna atanga mel 270 vela hla, Iotla Valley Elementary School bula field-ah a tla a, a tlakna bul hnaia awm te chu an him vek niin police lam chuan an tarlang.
James Brett hi rimawi khawvelah kum 30 chuang a tal ve tawh a, a tirah chuan solo artist angin bul a tan a, mahse, 2000s kum hmasalam atangin hlaphuah lamah a insawrbing ta zawk a ni. James hming hi hla hrang hrang 494-ah a phuahtu te zingah telh a ni tawh nghe nghe a, chung zingah chuan zaithiam lar tak tak Martina McBride, Kenny Chesney, Taylor Swift, Bon Jovi, Dierks Bentley, Faith Hill leh Keith Urban te pawh an tel.
Rimawi khawvela a hming a chherna chu 2005-a a phuah ‘Jesus, Take the Wheels’ tih hla niin, he hla hi Carrie Underwood-i’n sain, he hla a sak avang hian Underwood hian Grammy-ah award- Best Female Country Vocal Performance a dawng a, James Brett pawhin he hla avang hian Grammy, Best Country Song a dawng ve bawk.
James hi 2020 khan Nashville Songwriters Hall of Fame-ah lak luh niin, 2006 khan American Scociety of Composer-ah puan a ni a, 2010-ah Authors & Publisers (ASCAP) Country Songwriter of the Year a dawng tawh bawk.