Jet ski a hnung zawnga invawrh virin record siam

Birmingham a cheng jet ski champion, stuntwoman leh entrepreneur, Christy Swaid, kum 53, chu tui chunga an theuleu vel nana an hman thin, tuichung bike kan tih ve mai, jet ski hmangin tui chungah hnung zawngin a invawrh vir a, hetiang tithei upa ber record a siam.
Swaid hi record siam lamah a mikhual tawh bik lo a, jet sko world championship title pawh paruk a kawl tawh a, “One of the Fittest Women in America” title tum hnih a dawng taw a, International Personal Watercraft Hall of Fame-ah lak luh a ni tawh a, Pro Women Slalom world record title kawltu a ni bawk.
Swaid chuan tunhnaiah hun harsa tak tak a tawng niin a sawi a, 2020 khan a nu a sûn a, a pa leh a coach hlui ten inhnaih te tein thihsan lehzel a. Chu chuan a nun a vaw chau a, 2024 khan jet ski hmangin a intiharh leh thei chauh niin a sawi.
Swaid chuan jet ski backflip (hnung zawnga inbin/invawrh) expert nen an intawn atangin chutiang chu tihve theih chakna a nei ta niin a sawi a, “Chutihlai hian anxiety avangin ka buai em em a, hlauhthawnna avangin jail a khung beh ang mai ka ni. Chuta tanga tal chhuak tur chuan thil huaisen thlak tak eng emaw ka tih a ngai a ni,” a ti.
Swaid hian Birmingham chhimlam a Lake Mitchell-ah record hi siamin, vawi 10 a beih hnuah record hi a siam thei ta a ni. Swaid chuan, “Record siam tuma ka beih hmasak tum thum chu ka hlawhchham nghal zel a, a vawi li-naah a throttle level ka ke veilam nen a intauh a. Ka bei zui zel a, pem neuh neuh pawh ka nei, mahse, ka team ten min fuihphur zel a, a vawi 10-naah ka hlawhtling ta a ni,” a ti.