Mahmuaka Chhakchhuak
-- Advertisement --
Kum eng zat thleng nge kan dam dawn a hriat hauh loh laiin mi thenkhatte chuan kum za an tling bik a ni a. United State of America President ni tawh 46 zingah Jimmy Carter chu damrei ber la niin Oct. 1, 2024-ah khan kum za tlingin President zingah amah chiah hi kum za tling la awm a ni. US President 39-na niin, kum 1977 – 1981 chhung khan America mipui tan ram roreltu a ni.
US President-te hian chanchin ngaihnawm tak tak an nei hlawm a, Theodore Roosevelt khan kum 42 a nihin President William McKinley thah a nih avangin President thutthleng a luah tan a, US President zingah la naupang ber a niin John F. Kennedy chu kum 43 a nihin President atan thlan tlin a ni a, mipui thlan ngeia President naupang ber a ni. Joe Biden chu kum 78 a nihin President atan thlan tlin a ni a, vawiin thleng hian US President ni lai zinga upa ber chan ala changin Ronald Reagan chu kum 77 a nihin President a ni a, upa ber pahnihna a ni. Donald Trump pawhin kum 2021-a Office a chhuahsan khan kum 74 a ni a, kumin (2024) ah hian kum 77 mi niin a vawihnihna atan President a ni leh bawk a. Dwight Eisenhower pawh chuan kum 1961-a President Office a chhuahsan khan kum 70 leh ni 98 laia upa a ni a, chutiang bawkin Andrew Jackson pawh chuan kum 1837-a President term hnihna a chelh pumhlum meuh chuan kum 69 leh ni 354 laia upa a ni bawk.
Han sawi zel ila, US President term chelh rei lo zingah hian William Henry Harrison khan a chelh rei lo berin ni 32 chhung chiah President office a luah hman a. James A. Garfield chuan ni 199 chhung a luah hman bawkin Zachary Taylor chuan kum khat leh ni 127 chhung President a ni hmanin Warren G. Harding chuan kum hnih leh ni 151 chhung President office a luah bawk a. Gerald Ford pawhin kum hnih leh ni 164 chhung President office luahin Millard Fillmore pawhin kum hnih leh ni 238 chhung a luah a, John F. Kennedy pawh chuan kum hnih leh ni 306 chhung US President office a luah hman bawk. Hetianga hun rei lo tak tak chhung ram hruaitu an nih chhan hi a thente chu taksa lam hrisel lohna vangte pawh an ni ve bawk a; WH. Harrison hi pneumonia leh typhoid vanga boral a niin Zachary Taylor pawh taksa hrisel lohna vang a niin Warren G. Harding pawh heart attack vanga boral a ni a. James A. Garfield leh John F. Kennedy-te erawh hi chu kahhhlum an ni thung a. Misual kahhlum zingah hian Abraham Lincoln, William McKinley, Theodore Roosevelt te pawh kan chhiar tel thei ang a, Ronald Reagan pawh misual kahhliam ve tho bawk a ni.
Jimmy Carter hi Oct. 1, 1924 khan Plains, Georgia-ah piangin midang ngaihsakna leh ngaihhlutna nasa taka nei mi a ni a, chutiang mi a nihna chuan President hialah pawh a hlangkai nia sawi a ni bawk. Politics lama a luh hma hian kum 1946 khan US Naval Academy atangin a zir chhuakin Navy nia tuihnuai lawnga thawkin chumi hnuah chuan buh chingin buh hmanga sumdawnna a nei leh a, chumi atang chuan Politics lamah ke a pen leh ta a.
A chenna hmun Georgia State-ah chuan Senator atan thlan tlin a niin kum 1963 atanga kum 1967 thleng Sanator niin mipui tan rawngbawlna hna a thawk a. A hnuah Georgia Governor ni lehin kum 1971 – 1975 chhung Governor a ni a, mipui tana rawngbawlna a neih hian a naupan lai atanga midang ngaihsakna a neihna chuan ngainat hlawh phahin a kawng a tluang ang reng hle thin. Kum 1977 – 1981 chhunga US President dinhmun a chelh lai pawh khan mihring dikna chanvo, khawtlang dikna leh boruak humhalhna kawngah a inpe nasa em em a, chu lam chu a hmingthanna ber pawh a tihtheih ang.
Jimmy Carter President chhunga thil langsar thenkhatte:
Energy Policy: Carter hian ram pum huapin energy policy a siam tharin chu chuan ram chhunga petroleum man pawh a khuahkhirh lo thei lo a, thil siam chhuah lamah nasa takin hma an sawn phah a ni.
Environmental Protection: National park kalphungte chu siamthain Alaska hmuna ram, 105 million acre laia zau chu a humhalhna tha tak a siam bawk a.
Foreign Policy: Israel leh Egypt inkara Camp David Accords chhe tawh chu siamthain kum 1948-a Israel indan atanga ram pahnih indona lo awm tawh thin chu tihtawp a ni ta. Heng bakah hian People’s Republic of China nen diplomatic relationship kimchang leh tha tak an siam bawk.
Community Mental Health Centers Act: Mipui vangtlang hriselna atan vantlang hmuna Health Center siam chungchanga dan thar siam chu a thlawpin hriselna lama hmalakna chu a ngai pawimawh hle a, a hunlai hian hriselna lama an hmasawnna pawh hmuh theihin a awm.
Hetianga Carter-a’n remna, mihring dikna leh khawtlang mipui dikna lama a inpekna avang hian kum 2002 khan president lai leh a hnua diplomacy leh advocacy lama a hnathawh avangin Novel Peace Prize hlan a ni. He Nobel Peace Prize a dawn theihna chhan hi han sawi zau lawk ila: Kum tam tak chhunga khawvel puma remna, mihring dikna chanvo leh sum leh pai lama hmasawnna a thlen theihna tura a inpekna avanga hlan a ni a. President a nih tawh loh hnuah pawh khawvela remna thlen theihna tura a inpekna nasa takte avang chuan dawng tlaka ngaih a ni.
Kum 1982 khan The Carter Center dinin mihring dikna chanvo, khawvel hriselna leh ram leh ram inkara buaina chinfelna kawngah hma a la nasa hle a. Khawvel ram hrang hranga buaina leh harsatna thleng thinahte chuan a theih ang angin remna kawng a zawng thin. A bik takin Haiti, Bosnia leh Sudan ram buainaahte khan nasa takin hna a thawk a, remna thlenna turin mi pawimawh berte zingah a tel. President a nih laia din Camp David Accords chuan Israel leh Egypt inkarah nasa takin hna a thawk a, remna thlentu ber a tih theih hial awm e.
Heng bakah hian kawng hrang hrangin midang tan hna a thawk a, hriselna leh remna lamah phei chuan nasa taka hna thawkin President a nih tawh loh hnuah pawh chawlh nei loin ke a pen zelnate chu Nobel Peace Prize a dawn phahna a ni. Hetiang taka midang tana rawngbawlna nei chuan kumin, 2024 hian kum za a tling ta a, a lawmpui-awm hle a ni. President a nih tawh loh hnuah hian a pianna hmun Georgia khawpui Plains-ah kir lehin kum 1960-a a neih, a nupui Rosalynn nen an in sakah chuan a khawsa a, chutah chuan vawiin thlengin an la cheng a ni. A nupui Rosalynn erawh chuan Nov. 19, 2023 khan kum 96 min niin a boralsan tawh a, an fate pali zinga pakhat chuan boralsan tawh bawkin a fapa upa ber dawttu James Earl (74) chuan a pa hnung hi zuiin Politics lamah ke a pen ve mek bawk a.
A fa upa ber Jack Carter, kum 1947-a piang chu US Navy lamah lutin chumi hnuah sumdawnna lamah a kal bawk a, an fapa pathumna Jeffrey Carter erawh chu kum 1952 khan a pian hnu lawkin a boral a, a palina leh an fanu neih chhun Amy Lynn Carter hi kum 1967-a piang niin artist a ni bawk.