Joe Biden chesual zui zel, inhnukdawk tura duhna lian

Joe Biden chuan US president chuh leh ngei dawnin Donald Trump a hneh tur thu a sawi a. Chutih rual chuan tunhnaiah thil sawi sual nasat deuh deuh a neih avangin selna a tam hle thung.
NATO summit Washington-a neih tawp kharna press conference neihah kum 81 a upa chuan Democrats tena hlauhthawn an neih te chu a hriatthiam thu sawiin mahse president a chuh dawn tih a sawi a.
Joe Biden hian a hmain Ukraine President Volodymyr Zelensky chu Vladimir Putin tiin a introduce palh tawh a, Vice President Kamala Harris pawh ‘Vice President Trump’ tiin press conference neihnaah a sawi tawh bawk.
Kar hnih kaltaa Trump nena debate an neiha a chet chhiat em avangin Biden candidacy chuan sel a hlawh phah tawh a, a kum a upa tawh a, a hriatrengna a mumal tawk tawh lo tia sawi a ni bawk.
“President ni tura qualify ber ka ni a. Trump hi ka hneh tawh a, ka hneh leh ang” tiin Biden chuan press conference a neihnaah a sawi a.
US president ni tawh zinga upa ber ni tawh sa Biden chuan a hna bul tan tawh thawh zawh ngei a tum thu a sawi bawk.
Hetih lai hian Biden chu Democrats thahnem tak ten kum 2024 president thlanna ata inhnukdawk mai tura ngenin Trump a hneh zawh an ring lo a ni.
Democrats tam tak te chuan Biden-a vice president Kamala Harris chu ding zawk se an duh thu an sawi bawk a. “Hnathawk thei dawn lo niin inhria ila chuan ka ti hauh lovang a. Mahse, tunah chuan chutiang engmah tawn ka nei si lo a ni,” tiin a sawi.
Press Conference a neih zawh hnu lawkah Congress Democratic member tam tak te chuan Biden chu inhnukdawk mai turin an ngen a.
Press mite zawhna a chhan hmasakna berah a Vice-President Kamala Harris chu ‘Vice-President Trump’ a ti phawt a.
A hma lawkin Nato event neihnaah Biden chuan Ukrainian President Volodymyr Zelensky chu ‘President Putin’ tia introduced tawh bawkin an nui hluah hluah tawh bawk a.
A sawi sual tih hria in a insiam tha vat thung a. Mahse, Vice-President Kamala Harris tih aia Trump hming a lam erawh a tisual tih a inhre hauh lo thung.
Chanchinbu mite zawhna a chhanah cognitive test neih a mamawh lo a ti bawk a. Doctor pahnih emaw pasarih emaw pawh hmu mah ila min sawiseltute chu an lawm zo chuang dawn lo tiin a sawi bawk.
Biden chuan election campaign chu tan a ni deuh chauh a, November thlaa inthlanna neih hunah Trump chu a hneh ngei dawn a ti bawk.
Democratic delegates te thla thara convention neihnaa party nominee official a ni tura nemnghet tur te chuan an duh chuan Joe Biden chu an candidate atan an la hnawl thei thung.
Biden chuan a staff ten inthlanah a chak zo dawn chuang lo tih data felfai tak an pe thei a nih chuan a insaseng theih chauh thu a sawi a. Tunah chuan poll-ah pawh kan la intiat tawk a ti bawk.
Ningani khan Ipsos survey tena poll an tihchhuahah Biden chuan Trump chu point khat chauhin a pha lo mek an ti a. Thil chiang tak erawh kumtir phat atangin Trump leh Biden thlawptute chu an danglam vak lo ve ve a ni.
Hetih lai hian Democratic politician zingah Biden thlawpna hnukdawk tum an awm tam tia sawi niin chung mite chuan Nato summit neih fel an nghak tia sawi a ni bawk.