Joe Biden duhlotu lawk tial tial

Representative Adam Schiff chu Democrat heavyweight zingah pawh US President Joe Biden chu insasenga Donald Trump hmachhawn tura candidtae dang hmun kian tura titu nihna nei sang ber a ni.
Schiff hi congressional powerbroker pawimawh niin Biden chu fakin mahse Los Angeles Times tena an kawmnaah kum 81 a upa Biden chuan ‘kan democracy foundation tana hlauhawm’ Trump chu a hneh theih ka ring lo a ti.
Californian senator hi kumin November thlaa Senate seat chang ngei tura ngaih niin party chhungah pawh thiltithei ber pawl niin White House tana legislature thila mi pawimawh a ni bawk.
Kum 2019-a Democrats ten majority an chan lai khan house intelligence chairman a ni a, Trump first impeachment trial-ah khan prosecutor hmahruaitu ber a ni bawk.
Los Angeles Times te hnenah Schiff chuan party chhungah pawh mimal ang pawhin Biden upat tawhna leh hriselna chuan November inthlanah chakna an chantir loh hlauhna an neih thu an sawi thin tiin a sawi a.
A bik takin thla kaltaa Biden leh Trump tena debate hmasa ber an neiha Biden a chet nawi lutuk hnuah hlauhthawnna a nasa zual tiin a sawi bawk.
Candidate atanga inhnukdawh mai tura nawrna karah Biden chuan chiang takin a inhnuhdawh loh tur thu leh amah chauh chu Trump hneh thei a nih thu a sawi thung a. Poll lakah pawh an inhnehtawk hle a, swing state pawimawhah te chuan Trump an hma a hruai tawh thung.
Schiff chuan Biden chu ‘kan ram history a president pawimawh ber pakhat a ni’ tiin a dak thung a. Mahse, Trump a president leh a nih chuan kan democracy foundation ngei hi derthawngah a awm ang, tia sawiin Biden chuan a legacy humhim nan a inhnuhdawh a ngai tiin a sawi.