Joe Biden leh Donald Trump-an debate hmasa ber nei tan

US President thlanna neih tura debate hmasak ber neihah Joe Biden leh Donald Trump te chu an inbei na hle.
Trump chuan Biden chu economy leh world stage a hlawhchham thak tiin a sawi a. Tun hi president ni lai mek leh president lo ni tawh tena debate an neih leh hmasak ber niin an inpuhchhe tawn hle.
Trump leh Biden hi president-a thlan an nihah US president tawh zinga president nih tirah upa ber ve ve an ni bawk.
Biden hi kum 81-a upa ni tawhin Trump chu kum 78 a ni tawh bawk a. Atlanta khawpuia CNN headquarter ah debate hmasa ber an nei a. Lice audience an awm lo va, pakhat zawkin thu a sawi laiin a sawi lo zawk microphone off sak a ni bawk a, chungte chu a hmaa an thutlukna pawm tlan a ni.
Debate neih hmain Biden chuan hritlang a kai tia sawi a ni a, beisei lawk angin Trump chu thlan tlin a nih chuan White House in dan bawhchhia misual a neih hmasak ber a ni ang a ti.
“Civil penalty hrang hrangte ngaihtuah teh. Vantlanga hmeichhia i khuaikhem avangin civil penalty billion dollar eng zah nge i bat” tia sawiin Biden chuan Trump chu ‘i nupuiin i fa a pai laiin porn star i mutpui zui’ a ti bawk.
Rallies leh reality television vela sulhnu nei tha sa tawh Trump pawhin Biden record hrang hrang te sawi langin a bei na hle bawk a.
“Tun hnai kum li chhunga kan rama thil thleng hi a zahthlak a ni” tia sawiin Trump chuan, “Mi tam tak thian ka nei a. United States of America chunga thil thleng mek hi mak an ti a, zahin kan awm tawh lo” tiin a sawi.
Trump chuan Biden thusawi dan sawisel bawkin, “Eng nge a sawi pawh ka hre mumal thei lo, amah pawhin a thusawi a hre lovang” tiin a sawi bawk.
Biden communication director hlui Kate Bedingfield chuan president Biden chu debate neihah a che chhe tak zet tiin a sawi a. “Tihngaihna vak a awm lo” tiin debate zawh tawh hnuah a sawi.
Debate tirhah Trump-an inflation chungchangah zawhna a zawh veleh Biden chuan economy ‘tluchhia’ a chhawm tiin Trump chu a bei zui nghal a.
Trump thung chuan ‘kan history-a economy turu ber ka kalpui zawk’ tia chhangin, “ram dang zawng zawngin min copy a ni” a ti a.
Biden chuan chhang letin, “Khawvela economy turu ber maw? Amah(Trump) ngaihdan mai a ni” a ti thung.
Mimal thil tak sawinaah Biden chuan Trump chuan Indopui II laia Normany inbeihnaa sipai nunna chan te chu ‘sucker’ tih leh Biden fapa Beau Iraq indonaah pawh tela a hnua cancer vanga thi pawh a hmer tel a ti a.
“Ka fapa kha loser a ni lo va, sucker a ni hek lo; nangmah hi sucker i ni a, loser i ni bawk,” tiin Biden chuan a sawi bawk a.
A hnuah erawh Trump chuan Biden-an a sawi anga a puhna chu a sawi a awm hauh lo tiin a insawifiah thung.
World Stage kaihhnawihah Trump chuan Biden chu Israel-in Hamas te an nuaichimih tumna kawngah tanpui tha duh lo tiin a puh bawk a.
“Palestinian ang mai a ni tawh a, mahse, Palestinian te pawhin Palestinian ah an duh lo, Palestinian chhe mi a ni a, chak lo a nih tlat vang a ni” tiin Trump chuan a sawi.
Trump chuan Afghanistan atanga Biden an US sipai a kohhaw pawh sawiselin ‘kan ram thil tawn tawha zahthlak ber’ a tih khum a, Russia-in Ukraine a run theih nana tiphurtu tiin a puh bawk.
Biden thung chuan amah chu president sipaite ram pawna dinhmun derhtawnga dah lo ngam awm chhun a inti ve thung.
Trump leh Biden te hi abortion leh immigration chungchangah an ngaihdan a inang lo bawk a.
Biden chuan nau tihthlak phalna Roe vs Wade titawp tu Supreme Court justice ruattu tia sawiin a bei a, ‘thil rapthlak tak i ti a ni’ tiin a sawi.
Debate zawh hnuah Democratic supporter te chu Biden performance avangin an hlauthawng zawk tia sawi niin Biden chu debate neihah awmze mumal taka thil sawi tawk lovah an ngai a ni.