‘Joker: Folie à Deux’-in beisei pha lo mah se box office-ah a No.1
Todd Phillip-a antihero musical, Joaquin Phoenix leh Lady Gaga te channa ‘Joker: Folie à Deux’ cuan CinemaScore D a hmu a, Hollywood comic book pic zingah hetiang khawpa grade hmu chhe hmasa ber a la ni a, a sum lak luh pawhin beisei pha lo hle mah se North American box office-ah a No.1 tho e.
‘Joker: Folie à Deux’ hian tun weekend kalta khan North America-ah cinema hall ticket hralhna atangin dollar maktaduai 40 la lutin, box office No.1 a ni a, a film siam nan hian dollar maktaduai 190 vel zet an seng thung. He film hian opening weekend-ah US-ah a chhe berah pawh dollar maktaduai 70 vel tal la lut thei turin an chhut a, mahse, beisei a pha ta lo hle a, cinema entu te exit poll-ah pawh a entu ten an beisei a phak loh thu an sawi uar hlawm hle a ni.
US pawnlamah erawh a ziaawm deuh a, dollar maktaduai 81.1 a la lut thei a, tihian opening weekend-a a lak luh zawng zawng chu dollar maktaduai 121.1 a tling a, US pawna a lak luh hian a chhanhim ta deuh zawk a ni. Hetihrual hian market lian China leh Japan-ah te an la tlangzarh lo.
2019 khan a film hmasa zawk, Todd Phillip siam tho ‘Joker’ chuan opening weekend-ah US-ah dollar maktaduai 96.2 a la lut thei a, dollar maktaduai 55 chauh senga siam niin, khawvel huapin dollar tluklehdingawn a la lut tling tawh a, R-rated film-ah phei chuan Deadpool & Wolverine an tlangzarh hma kha chuan sum la lut tam ber a ni reng nghe nghe a ni.
Joker film hmasa zawkah khan Phillips leh Phoenix te hi an lo thawk dun tawh a, Phoenix hi Arthur Fleck/Joker lemah changin, Oscar-ah pawh best actor a dawng nghe nghe a, tun tumah hian Lady Gaga pawt lutin, ani hi comic book character to Harley Quinn lemah a chang ve thung.
Animated movie The Wild Robot a la kaltluang viau a, dollar maktaduai 18.7 la lut lehin No.1 atangin No.2-ah a tawlh a, he film hian kar hnih chhungin US-ah dollar maktaduai 63.9 a la lut tawh a, khawvel huap phei chuan maktaduai 100 a la lut tling der tawh.
Box office-ah pawh kar hnih No.1 thei, Beetlejuice Beetlejuic-in dollar maktaduai 10.3 la lut lehin No.3 a la ni a, he film hian North America-ah dollar maktaduai 265.5 la lut tawin, khawvel huapin dollar maktaduai 402.6 a la lut tling tawh bawk.
Chhungkaw kima en thap theih chi, animated movie Transformers One-in a weekend vawi thumnaah dollar maktaduai 5.4 la lut lehin box office No.4 a la ni a, he film pawh hian US-ah dollar maktaduai 47.2 la lut tawhin, ramdanga a lak luh nen chuan dollar maktaduai 97 a tlin ve tawh bawk. Top five khartu chu Speak No Evil niin, dollar maktaduai 2.8 a la lut leh a, tihian US-ah dollar maktaduai 32.6 la lut tawhin, US pawna a lak luh nen chuan dollar maktaduai 67.4 a tlin ve tawh bawk.
Box office top 10:
1 Joker: Folie à Deux $40,000,000
2 The Wild Robot $18,700,000
3 Beetlejuice Beetlejuice $10,325,000
4 Transformers One $5,350,000
5 Speak No Evil $2,800,000
6 White Bird: A Wonder Story $1,530,000
7 Deadpool & Wolverine $1,526,000
8 The Substance $1,346,938
9 Megalopolis $1,050,000
10 My Old Ass $908,376