Jon Jones an ropui zual zel

Pathianni zing khan New York khawpuia Madison Square Garden-ah hlawhtling takin UFC 309 neih a ni. USA President thlan thar Donald Trump-a’n a hmuna a en UFC 309 a fight ngaihven hlawh berah palian champion Jon Jones chuan Stepe Miocic hnehin a kawnghren a humhim. Palian huangah a kawnghren a humhim theih vangin Jones a ropui zual zel a. Jones lakah a tlawm vangin palian huanga champion ropui ber Stepe Miocic erawh chuan UFC a chawlhsan ve thung.
UFC-ah fighter ropui bera ngaih ni mek Jon Jones leh UFC Palian huanga champion ropui ber Stepe Miocic ten kawnghren an inchuh tur hian ngaihven a hlawh hle. Champion hlui Miocic lakah light-heavyweight huangah vawk lal lena hnuhma ropui tak hnutchhiah a, palian huanga champion lai ni mek bawk Jones hian chak turin rin a kai hle. Miocic hi palian huanga champion ropui ber ni bawk mah se kum 41 mi lai a ni a, a tha a thum ve tawh vangin Jones lakah rin a kai zo meuh lo. Rinlawk ang ngeiin Jones a khel tha a, harsatna lian tawk lovin hnehna a chang.
Champion lai Jon Jones hian Miocic lakah bul a ta tha viau a, round khatnaah keuh tluin a knock-out hman teuh hle. A khingpui kut thlak na tak tuar fo chunga Miocic a tlawm lo kha thil mak a tling. Round hnihnaah Miocic a insiamtha hret a, talbuai lovin round a hmang tluan thei. Round thumnaah erawh Miocic a buai ta viau thung a, a tlawm ta nge nge. Jones hian fuh zetin a hnek fuh zawn a, ngaiawh phak lovin a khingpui a siam. Round thumna tawp dawn tepah Jones hian mawi leh fuh zetin Miocic nakah a back-kick fuh a, Miocic hi thochhuak tur awm lovin a tlu a, Jones chuan knock-out hmangin hnehna a chang a, a kawnghren a humhim zui ta a ni.
Palian champion ni mek Jonathan Dwight Jones hian UFC-ah hnuhma a nei tha hle. Kum 23 mi lek a nih laiin light-heavyweight champion a ni a, UFC-ah champion thei naupang ber niin a record khum thei an la awm lo. Light heavy-weight huangah hian kawnghren humhim zawn rei ber, chak ngun ber leh chak zawn rei ber record a siam tel bawk. A chak theih em em laiin kum 2015-17 chhungin hrem a tuar a, fight a hmachhawn thei lo. Kum 2018 khan octagon-ah kir leh a, a kawnghren hloh tawh a la let leh nghal.
Light heavy-weight ah ro a rel reng hnuin kum 2023 khan palian huangah a insawn. Palian huangah fight a hmachhawn hmasak berah awlsam takin Ciryl Gane a hneh a, palian champion a ni nghal. Palian champion a nih hnuin palian huanga champion ngun ber Stipe Miocic hmachhawn a duh thu a sawi a. UCF 309-ah palian huanga fighter ropui ber Stipe Miocic chu awlsam takin a hneh a, mellung thar ropui tak a phun belh. Miocic a hneh hnuin Jones hian chawlh mai a la tum loh thu a sawi a. A khingpui leh tura rinkai Tom Aspinal leh light heavy-weight champion Alex Pareira te zingah tu zawk nge a thlan dawn tih erawh thutlukna a la siam fel loh thu a sawi thung.
UFC-ah Jon Jones a ropui zual zel laiin palian huanga fighter ropui ber zinga mi Stipe Miocic erawh chuan tlawm chungin UFC a chawlhsan thu a puan a ngai ve thung. Miocic hian kum 2010 khan UFC a luhchilh a, a chawlh thlengin fight vawi 25 hmachhawnin vawi 20 a chak a, tlawm zawkah vawi nga a tang. Fighter huaisen leh fing tak a ni a, palian huangah tum hnih a champion a, palian huangah a kawnghren kawl lai humhim rei ber a ni tel bawk