Chief minister Lalduhoma chuan ruihhlo ngai enkawlna atan Jordan Centre Sethawn chu sawrkarin kalpui thar a, thiamthil an zir nghalna hmuna siam turin Social Welfare department a hrilh. Ruihhlo ngai enkawlna ho chu sawrkara inziahluh vek tul an tih thu sawi a ni bawk. Chief minister Lalduhoma leh Social Welfare minister Lalrinpuii chu Mizorama ruihhlo hluar zel dona leh ruihhlo ngai enkawlna chungchang sawiin an inkawm a. Social Welfare department hotute an tel bawk.
Social Welfare department hian hma an lak mekna leh an hmachhawp an sawifiah a. Mizorama ruihhlo ngai enkawlna, Integrated Rehabilitation Centre for Addicts (IRCAS) 11 tihlenna tur, hetiang centre la awm lohna district 5 – Saitual, Khawzawl, Hnahthial, Lawngtlai leh Mamit-a din ve na tur sawrkar laipui Ministry of Tribal Affairs-a funding an zawn mek thu, Thingsulthliaha Multi-Disciplinary Treatment & Training Centre din tum leh Jordan Centre kalpui dan tur an sawi.
Chief minister chuan ruihhlo ngai centre-a awmte an dam chhuah tak tak theihnan after-care skill development ngaihpawimawh a tul thu leh Jordan Centre pawh thiamthil an zir nghalna hmuna siam tha a tih thu sawiin, hma la nghal turin department a chah.
TNT leh kohhranin a enkawl de-addiction centre-te pawhin skill development program an kalpui theih dawn chuan a tul anga sawrkarin grant -in- aid pek a inhuam tih a sawi a. Hemi kawngah hian Social Welfare minister hian hma a lak nghal tur thu chief minister hi a hrilh a ni.
Tawngtai Bethel Camping Centre chungchang pawh sawi a ni a. Minister hian sawrkar kaihhruainaa an enkawl zawh tawk damlo admit a, mumal zawka kohhran leh khawtlang hruaitute nen thawkho chunga kalpui dan sawipui a tum tih a sawi a ni.
Hemi hnu hian Social Welfare minister hian kohhran hruaitute, CYMA, MUP bakah Mizoram Kohhran Hruaitute Committee leh Council of Churches in Mizoram aiawhte a kawm a. The Mizoram Drug (Controlled Substance) Act 2016 leh The Mizoram Drug Treatment -cum- Rehabilitation Centre Accreditation Rules 2019 leh a inkaihhruaina zawma centre zawng zawngin sawrkara an inziahluh vek a tul tih sawiin, inziaklutte sawrkarin puih a tum dan a hrilh. Ruihhlo ngai enkawlna leh a invenna lama anmahni zawn theuha tan la tura ngenin, thawhpuiah a sawm a ni.
Inkawmnaah hian kohhran atangin – Presbyterian Church of India, Baptist Church of Mizoram, Salvation Army, Seventh Day Adventist, Isua Krista Kohhran aiawh an tel a, ruihhlo hluar zel leh ruihhlo ngai pung zel chu pawi an tih thu leh an ngaimawh thu sawiin, a theih ang anga hma lak tul an ti tlang. Ruihhlo ngai enkawl dam chu thil harsa tak a nih avangin Pathian thu leh kohhran behchhana kal a tul thu sawi niin, a invenna lamah kohhran-ten nasa zawkin inzirtirna kalpui nise, an ti.
Jordan Centre kalpui thar leh dawn
Get real time updates directly on you device, subscribe now.