Ka department hnuaia contract hna tha lo chu blacklist a tul ang – Education minister

Ka department hnuaia contract
hna tha lo chu blacklist a tul ang
– Education minister
A department hnuaia contract hna thawk tha lo chu hrilh an ni hnua an la zawm loh fo chuan an security deposit atanga thawh chhunzawm emaw firm blacklist emaw bakah an hnuaia thawktu engineer thlenga blacklist a la tula a rin thu Education minister Dr Vanlalthlana chuan a sawi.
Higher & Technical Education leh School Education minister Dr Vanlalthlana hian Siaha-a a college leh school a endiknaah he thu hi a sawi a. Tun tuma a zin chhuah hi, chief minister-in minister zawng zawngin district tin fang a, district headquarters ni lo khua pawh tlawh tura a tih vang a ni tih a sawi. A hmuna kalchilha hmuh hian rinthua thiltih aiin a tha zawk tih sawiin, office atanga thu tihtluk dawnah pawh an mitthla theih ngei kha an duh dan a ni tih a sawi a ni.
Govt Saiha College tlawhin thawktute nen an inkawm a. Class room, library, seminar hall leh staff quarters bakah boys hostel sak mek a enfiah. Principal Prof Abdul Hannan Barbhuiya sawi danin an college hi 1978 July 20-a din a ni a, kum 2020 khan NAAC accreditation ‘B’ grade a hmu. Department 7 – English, Mizo, Political Science, History, Education, Economics leh Sociology awmin zirlai 374 (even semester) an awm a ni. Library-ah lehkhabu 7960-a awm a, CCTV vuah vek niin kum 2022 atangin library automation an kalpui tawh. Teaching faculty 24 awmin an zingah hian contract/ part-time /casual-a thawk 12 an awm a, post ruak 6 a awm.
District Education Officer office leh Govt Higher Secondary School Siaha tlawhin thawktute nen an inkawm a. District Institute of Education and Training (DIET) Saiha-a girls hostel sak mek tlawhin a sak dan tura duan ang thlapa sak a ni em tih a endik.
DIET Saihaa thawktute leh zirlaite nen inkawm a. Zirtirtuin zirlai engzat nge a zirtir a, subject pakhat mi engzatin nge zirtir tih data kimchang an nei tih sawiin, Hnahthial leh Khawzawlah DIET din tum a ni tih a sawi a ni.
Minister hian Siaha Circuit House-ah mimal leh pawl amah hmu duh tan hun a hawng a, mamawh an thlen a ni.