Kai thar Tuipuiralin Sujith senglut

Leithum tlangval Michael Lalfinga leh Khuangthing chhuanvawr Lalpianpuiate bula khel turin Tuipuiralin Karnataka atangin Sujith Kumar an lalut.
Farkawn khuaah Tata SK 712 Pro Volleyball League khel turin nikuma din Tuipuiral Volleyball Club an inkulh mek a; Mizoram volleyball inelna sang bera an tel vawikhatnaah a tikimtu ringawt nih an tum lo.
Mizoram khaw chhak tlang dungin kumin hian an infiamna kutpui ber Tuipuiral Games kum 50-na an hmang. He hun bik hian an la tawn ngai loh Pro Volleyball khel tur Tuipuiral a tiphur a, hei vang hian beiseina sang lehzual nei turin Dubai, Maldives leh Oman club hrang hranga volleyball khel tawh Sujith an biak fel rualin phurna nasa leh zual an neih phah.
Sujith hian 2019 Pro Volleyball champion Chhinga Veng Spikers tan khel tawhin, 2018 MVA Invitation-ah a champion-pui a, nikum khan Pro Volleyball khel bawkin Tuichangral pawhin season hawnna tournament-ah an hmang a, state pawn player zinga Mizorama tawnhriat nei ngah a ni.
Kai thar Tuipuiralin Pro Division-a season khat an hman mekah tournament vawi hnih khel tawhin awmzia an nei zo lo a, club an din ruala an beisei ber Pro Volleyball-ah tel thei lo mai tur dinhmun derthawngah an awm hman nghe nghe.
Khaw hrang hranga awm an nih avangin inkohkhawm leh inpuahchahna chungchang-ah harsatna an tawk a, hruaitute’n player indaih lo leh inbuatsaih mumal lo chunga tel hrim hrim an duh lo.
Theihtawpa hma an lak hnuah Far-kawnah inkokhawmin, captain Finga leh assistant captain Pianpuia hoin an inpuah-chah a, an mamawh chhanna leh team tichaktu ni ngei turin Sujith an beisei.
Kum 2018 khan Tuichangralin a vawikhatna’n Pro Volleyball khel tawhin, Aizawl pawn atanga tel hmasa ber an ni a, season khat an hmannaah final lut nghalin, Hunthar an paltlang zo lo a ni.
Pro Division-ah Tuichangral awm zui zelin, Tuipuiral an tel ve leh rualin Pro Volleyball chanchina a vawi-khatna’n Aizawl pawn team pakhat aia tamin title an chuh dawn.
Thla thar June ni 8-ah Chhinga Veng Spikers nen inkhelin Tuipuiralin league bul an tan dawn a, Tuipuiral Game and Sports Association chuan duhsakna sang ber an hlan.