Kalphung thar atan system thlak chu an party intiamna a ni a, kalphung thar atan mi tha an mamawh tih ZPM leader Lalduhoma chuan a sawi.
ZPM Aizawl East-I Block chuan Inrinni khan Thuampuiah Block Conference an hmang a, he hun hmanpuitu ZPM leader chuan Congress leh MNF rorel kalphung chu kalphung hlui ve ve, chief minister chair-a thu an inthlak a, an party symbol a danglam a, an flag a inang loa, ram an kaihhruai dan chu a inang reng, tia sawiin, “He system hi keini chuan thlak kan duh a, kalphung thar kan sawi thin. System kan thlak ang kan ti a, system tha hnaiah chuan thil tha tih a awl, system a that loh chuan thil tha a tih theih loh. Kalphung thar atan chuan mi tha kan mamawh a ni,” a ti.
Development chu mi tam takin an kalpui thei a, mah se, development ringawt chu a lokal a lokal chuan mihring an nuamsa tual tual a, zu leh sa an chen tam tual tual a, an hrisel lo tual tual a, Pathian an hlat tual tual thin niin Lalduhoma hian a sawi. “Pathian tel lo development hi a hlauhawm a. Kan ram hian hma sawn se kan duh rualin, Pathian duh danin kan ram hi thang turin kan duh. Kan ram politics-ah Pathian ram kan thlen tir phawt anga, a dang pawh min pek belh zel dawn a ni,” a ti.
ZPM working president K Sapdanga pawhin thu sawiin, mipui sukthlek thlirin sawrkar kalphung thar an nghakhlel hle tih a hriat theih tih a sawi a. Tuna kan ram inrelbawl danah chuan kalkan a ngah em em a, hmun kilkhawr zawk amiten sawrkar a awm tih pawh hre lo khawpin hmasawnnain a kalkan nasa tih a sawi. “Politics hi inbumna tur a ni loa, ram rorelna tur a ni. Mipui hian beisei an nei a, chu an beisei chu pe thei awmchhun chu ZPM hi a ni,” a ti.
Kalphung thar atan mi tha kan mamawh – ZPM leader
Get real time updates directly on you device, subscribe now.