Kalphung thar min zawrhtuten dap chawpin min kalpui leh si – Rosiamngheta

ZPM-in a bu nei sa nia insawiin mipuiah kalphung thar an zuar a, dap chawpin sawrkar an kalpui leh si tih Congress hruaitu Rosiamngheta chuan a sawi.
Zirtawpnia Congress Bhavan-a inkhawmah AMC corporator Rosiamngheta chuan, sawrkar kal dan tur bu thar neisa nia insawiten a bu an zirchawp a. An minister-in kuminah zirlai admission ti an tam avangin zirlaibu a indaih lo a ti ringawt a, an ennawn a, admission ti tlem tum a lo ni leh si, tia sawiin, “Kawng pawh an sawi a, chhuanlam an zawng reng. Kawng chu mi sawrkar hlim pawhin an lo siam ve tho a. Congress, MNF pawhin an siamtha tawh a, chhhuanlam neia kawng siamtha lo awmchhun chu ZPM chiah an ni,” a ti.
ZPM party chuan eptuten an bei nia an insawi laiin, an thusawi tawh an sawi chhawng mai zawk a ni tih a sawi a. “Kan bei reng reng lo. Anmahni thusawi tawh hian anmahni a um ngat ngat a ni,” a ti.
Official-te kaihruai thei tur politician hriatna nei chu he ramin a mamawh tawh tih Congress hruaitu hian a sawi a. Pawisa lam hre huam ringawt, hmasawnna sawi dawna harsa ti em em an ni tih sawiin, “Politics hi sum siamna ni loin ram siam nan hmang ila, chutah chuan kan tuchhuanten nun nawm nan hmang rawh se. Sawrkar chuan mipui a enkawl anga, a ti himdam anga, hma a sawntir tur a ni. Chutiang lam ngaihtuahna chu a awm lo. Kalphung thar an ti ringawt, a sawifiah rawh pawh ti ila tihngaihna an hre lo,” a ti.