KALPHUNG THAR SAWRKAR-A KALPHUNG NILO

R.Lalrinkima
Hidden Lodge
Chanmari, A izawl
He chanchinbuah hian Politic khel mi chihnihte nihphung kimchang lo takin a lerah ka han thuai tawh a, han tih leh vak tur awmin ka hre tawh lem lo a. Khang politician chihnihte nihphungah khan tun sawrkara MLA te hian eng ber kha nge an nih tih chu an inhre maiin a rinawm a, opposition MLA te pawhin an inhriat tho ka ring, party worker lam chu dahtha ta ila?
Kalphung thar sawrkarah hian kalphung hlui zia thenkhat an zawm ve tho sawi neuh neuh chu a tam viau mai. Hei, Aizawlah chuan Aizawl Municipal Council (AMC, EMC ti zuah zuah lah hi kan la tam, chungte chuan Eizawl an ti leh bawk si lo?) thar tur Kalphung Thar sawrkarah kan thlang dawn chu a ni a, result a nghahhlelhawm nghal riau mai. A chhan chu MLA Bye election ah nasa takin ruling an chaklo a, chhim lam Autonomous District Council inthlanah lah pathumna an hauh pha tawk a. An chetlak thiamlohna lam region anih vangah te pawh ngaihsak ila,a ni thei tho bawk a. A lehlamah chuan candidate siam chungchangah an che fuh lo tih an sawi hi a pawmawm viau awm e, Dampa bial MLA Bye election ang khan?
Ni e, kalphung thar sawrkar siamtu hi hmannia ka sawi tawh ang khan party member vote in an tlin zawh theih loh vek avangin neutral te vote a ni chawk. Sawrkar lai ninna vangin a thlaktu tura neutral tam zawk duh ang ang chu sawrkarna siamtu an ni fo awm e.
PARTY MEMBERSHIP FEE BEITHAM NGHAWNG
Party member ten membership fee an thawh a, a beitham viau mai, inthlan campaign na atana han hman tham a awm lo tih hi party mal tin te hian an hrechiang em em a. Hei vang hian sawrkarna changtute chuan sawrkarna an chelh chhunga Department hrang hranga hnathawh tur awm chu ‘a awm lo lutuk zozai e’ tih tur khawpin hna an chuh nasa hle thin. Kan sawi tawh angin kan Rorelna In zahawm takah pawh House Leader meuhin an party mi leh sa Contract hna thawk reng rengin party fund, estimate atanga chhuta zaa pathum(3%) an lak thu a sawi kan tih kha ! Sawrkar hnuaia ka thawh ve lai khan Contract hna thenkhat, Tender chhuah loa Departmental work-a thawh tur chi angah khan Contractor hlep tura 15%, Schedule of Rates a telh kha kan paih thin a.Hlep awm loin estimate ang chiahin thawh theih a ni tihna a ni. Nimahsela, ruling party an nihna anga Departmental work chu party mi leh sain an thawh tak avangin party fund-ah engemawzat chu a thehluh a ngai ta si a, hei tak mai hi hna chhe tak tak tam em em na chhan chu ni. Department lam officer, hna enkawltuten dik taka thawk tura an tih leh Party hotu lamah chu officer chu an hek a, transfer hial an tawk thin a nih hi ! Hei hi tun sawrkar Kalphung Tharah hian an ti ve em ka hre ta chiah lo?
PHAI LAM ZIN DAWNA DEPARTMENT PAWISA THAM CHING
Hei hi hun rei deuh kaltaah khan Department Head pakhat chu Minister in Delhi lama sawrkar laipui dawr tura a kal tur chuan pawisa pai turin a ti a. Chu Head of Department chuan ‘eirukna lakah fihlim sawrkarin siam in ti a, ka lawm tehreng nen i zinna tur pawisa hi dawta pawisa siam a ngai dawn si a, a va buaithlak awm ve?’ tiin a lo chhang a nih hmel a, an inpe ta nge ka hre zui ta lo bawk. Ni e, tunhma lama Department pawisa thama Central Ministry lama fund hnuhchhuahna turah Central Ministry lama thiltithei deuhte lawmman angreng tur hi an lo keng thin niawm tak a ni a, chutiang chu tih ve tumna a awm pawh a ni mahna le? Hetianga suma tlawn ngai ang chi hi Central lama hnathawkah khuan an awm reng nge kan zuk ti vir zawk tih hi ngaihtuah tham a ni. Project lian tak nawr chhuak tur chuan Central Ministry hnuaia Secretariat a hnathawk thenkhat pamham tak an awm a ni thei, mahse ‘hetiang hi keini Kristian Pathian ringtute chuan kan ti ve ngai lo a’ ti ngam ila, project chu hmuh loh phah nan kan hman ka ring hran lo?
GOVERNMENT PROTOCOL HRE LO HI A AWM THEIH
Governor atanga Peon thleng hian sawrkar hian kal dan phung Protocol fel tak a nei a, hetiang hrelo hi Politician senior tak tak zingah an awm fo angin Politician Junior tak te zingah hre lo fe fe a awm theih bawk. Entirnan:- Minister-in an chanpual Department hrang hrangah Head of Department an awm theuh a, chungte nen chuan Department hmalakna tur sawihoin Department changtu Secretary ten an hriatpui a tul thin. Chuti ni loa, Department Head ni lo, Department chhunga hmelhriat neih that vanga Head of Department kalkan ching hi awm theih a ni, hei hian Department chhunga hnathawkte inunauna leh thawhhona a ti chhe nasa em em. Tun sawrkarah hian Department pahnih-ah hetiang hi sawi a awm ka hria a, a tak tak a nih ngat chuan a zia lo ngawt ang. Tin, Minister emaw MLA emaw nih vanga an bial chhunga officer awm te Head of Department hriatpui loha thu lo pek mai te, hnathawh tur lo hrilh mai te an awm hian Head of Department tan a luhai thlak fo. Minister emaw MLA emaw nih vanga thil hre tak anga lan tuma hre fumfe si lo te hi an hnawksak duh viau bawk. Hna chungchang a kipa kawi hre tur chuan zir peih ve a ngai a, zir tur chuan Department lam mithiamte zawh peih a ngai hle. Chuti lova hre ve riai ruai hre zik tluak si loina department chhunga tuemaw uisathiam a neih vanga ‘ar khaw thim dai’ taka hna kalpui tum hi awm theih a ni, hei hi kan Politician ten an hre fuh lo chawk a, Department inrelbawl dan a nghawng an hre thin lo a, a pawi khawp mai, Minister/MLA ten an uisathiam hnena an thu thlen chu Department head kaltlang loin a tih puitlin theih si loh a, hei hian rah tha lo tak a chhuah fo thin. He thilin a nghawng theih pawi tak chu Minister/MLA thu ni hauh lo chu uisathiamte te chuan anmahni hamthat nana ‘Minister/MLA in lo ti rawh a ti a’ tihna kawng thui tak a in hawng thin a, Department Head tan a hrilhhai thlak duh hle thin.
‘Kawngkapui atanga lut loa tukverh atanga mi in chhunga zuan luh hi’ tu chhungkua mahin kan duh lo a nih hi.