Kamala Harris-i’n delegates tam zawk thlawpna hmu

Vice-Presient Kamala Harris chuan US president atana party nominee ni turin Democratic delegates tam zawk te thlawpna a hmu der tawh.
Associated Press tena survey an neihah voting first round atana delegates a mamawh 1,978 aia tam a hmu der tawh tiin an tarlang a.
Chumi awmzia chu Harris chu party standard bearer ni dawnin November thlaa presidential election neih hunah Republican Donald Trump a khing dawn a ni.
Thla thara Chicago a Democratic National Convention (DNC) neih hunah party delegates ten vote thlakin official a ni thei chauh dawn thung a ni.
Delagtes te hi electoral area aiawh tura thlanchhuah te an ni a, thu a Kamala Harris an thlawp thu an sawi hi finfiahna la awm lo mahse inthlak danglam lo tura ngaih a ni.
Pathianni kaltaa President Joe Biden-an a inhnuhdawh thu a sawi atangin tumah Harris khing tum an la awm lo.
President Biden chu party chhungah Trump nena debate hmasa ber an neiha a chetchhiat em avangin inhnukdawk tura nawrna nasa tak a tawh hnuah a inhnukdawk ta nge nge a ni.
Biden inhnuhdawh hnuah leh Biden ngei pawhin Harris chu a thlawp thu a sawi hnuah Democratic nominee a nih theih nana thlawpna nasa tak a hmu nghal a, sum zawng pawhin donation dollar million tel pek a ni nghal bawk.
Wilmington, Delawarew a campaign headquarter a thusawina a neihah Harris chuan ‘Donald Trump te ang type hi ka hria’ tiin a sawi a.
Biden-Harris campaign chuan he ram hmalam hun version hrang pahnih chungchang hlir a ni tiin chu chu anmahni leh Trump te lam tiin a sawi a.
“Pakhatin hmalam hun thlurbing laiin, pakhat chuan thil kal tawh an thlurbing thung” tiin Harris chuan a sawi a, “Donald Trump hian kan ram hnungtawlha hruai a tum a. Keini chuan Americans tin te tan hmalam hun eng zawk kan thlir thung” tiin a sawi.
Biden hlawhtlinna te sawi bawkin Biden hnuaia vice-president a nihna chu ‘ka nuna hun ropui ber pakhat a ni’ tiin a sawi.
Harris-i’n dawhsan a lawn hmain Biden chuan kum 2024 election atana a inhnuhdawh hnua a thusawi hmasak ber chu phone call hmang neiin Covid-19 a kai avanga a inlak hran lai mek a ni bawk a.
Biden chuan amah thlawp tute chu Harris lawm taka thawhpuia pawm tura ngeiin a chhan chu ‘A tha ber a ni’ tiin a sawi a.
“Nimina chanchinthar kha mak in ti a, pawm thiam pawh harsa in ti mai thei a, mahse, tih tur dik tak a ni tlat a ni” tiin Biden chuan a sawi.
Biden chuan campaign neihnaah theihtawp chhuah a tum thu sawiin a chhan chu democracy derthawngin a awm a ni a ti bawk.
Hetihlai hian Trump running mate Senator JD Vance chuan Virginia a campaign a neihnaah Harris leh Biden te chu a sawisel a.
“History in Joe Biden chu bansantu a nih mai piah lamah United States of America history a president chhe ber pakhat angin a ngai ang” tiin a sawi a.
“Mahse, thiante u, Kamala Harris hi a la chhe fe zawka chu chu mitinin an hria a ni. Joe Biden hlawhchhamna tinah hian a tel vek a, president a nihnaa a mental capacity ah pawh dawt a sawi a ni” tiin a sawi.