Kan candidate symbol hian thui tak entir a neih ka ring – Dr R Lalthangliana

AMC Ward No.VI corporator thlan turah Congress leh MNF candidate intawmin a symbol-a hmeichhia leh mipa inkai lai a hman chuan thui tak entir a neih a ring tih MNF senior vice president Dr R Lalthangliana chuan a sawi.
Ningani zing khan Edenthar Vengah ‘MNF Unit leh Congress Unit AMC Ward No.VI by-election campaign /joint meeting neih chu MNF hruaitu hian a hmanpui a. Lai Autonomous District Council MDC by-election ah MNF leh Congress an thawhho avangin hnehna sang tak an chang a. Tun AMC by-election ah pawh party lian, ngelnghet hlun tak pahnih thawhhona chu vote a pelhe loh chuan hnehna sang tak an chan ngei a ring tih a sawi.
“Vanduaithlak takin Pu John Zosangliana Ralte a boral a, he a hmunruak luah tur hian a nupui Pi Lalrinfeli (Mafeli) hi Congress leh MNF chuan common candidate-ah kan hmang a, lo thlangtling ngei turin bial mipui ka ngen a ni,” a ti.
He by-election a an common candidate symbol – hmeichhia leh mipa inkai lai chuan thui tak entir a neih a ring tih a sawi a. 2023 MLA inthlanpuiah khan party en loin, a mihring pawh en chuang loin, ZPM symbol ngawr ngawr enin mipuiin an thlangtling ta mai tih sawiin, “Eng inthlanah pawh khatiang boruak ringawt kha chu a thlen nawn ka ring tawh lo,” Dr R Lalthangliana hian a ti.
Congress leh MNF common candidate chu a campaign-naah mipui duhthusam ang diak diak a lo pha lo a nih pawhin, lusun khawhar hlimhlawl a ni tih bial mipuin lo hrethiam turin a ngen tih MNF senior vice president hian a sawi bawk.