“Kan fel tawh dawn”

Land revenue & settlement minister B. Lalchhanzova chuan, “Revenue department dawr har tia mipui ten an lo sawi thin chu, ‘kan fel tawh dawn’ tiin kan intuai thar mek a, kan officer ten hetiang tawngkam an hmang hi a ropui hlein ka hria,” tiin, Saitual district land revenue & settlement office thar a hawnnaah a sawi a.  
Land revenue & settlement department hi mipuiin dawr har tiin an sawi thin a, chu chu he department-a thawkte ngeiin an nemnghet a, ‘kan fel tawh dawn’ tiin fel an tum thu mipui hriatah an puangzar lehzel bawk a. Ngawi renga fel tum ai chuan, ‘in-tawng-bat’ chunga fel tum hian rah tha zawk a chhuah ngei pawh a rinawm a ni.
Land revenue & settlement department-a thawkte hi ‘dawr an har’ han tih tawng mai chu, he department-a thawkte zawng zawng duang khata hlumna a nih avangin thawktu thenkhat tan chuan ngaihthlak a hreawm duh phian maithei e; tin, mipui lam pawhin an ngaih-khaw-loh phah ang tihte pawh a hlauhawm rum rum mai.
Tunhma kum 10 vel kaltaah khan, RTI hmanga information diltu pakhat chu, a dilnate an han en chiang a, ‘lo nghak rawh’ tiin dilna a thehluh ni la lain a chhanna an pe chhuak leh nghal mai a. Kha kha RTI hmanga information dil chungchangah chuan ‘chhanna pekchhuah rang ber’ a nih hial a rinawm; khatiang kha thleng leh tawh tak maw, tun hnuah hian?!
LR&S Deptt hi dawr chu an har khawp mai. Land record teh fel tur a tam ve si, pawn chhuak chi thawktu (surveyor) an tlem ve bawk si, surveyor-te veivahna senso tumsak inhuam an insehmur tuau tuau chung pawhin, a tihngaihna ngang a awm lo a ni, Dawr an har a ni.
 Tuna ‘Decentralization’ kalpui an tum dan hi thil tha tak a nih a rinawm a, empanelled firm kaltlanga hma lak a nih chuan, ram teh tura a kuma kum nghah ngai ang chi pawh, kar lovah a fel chho duak duakin a rinawm a. A nihna takah chuan, Surveyor-te koh kal nan mipui hian sum an seng reng tho a, chuvangin thawktu tam an pawimawh a ni. LESDE nena thawhdunna te, ITI syllabus-a land revenue kaihhnawih a tel tur te hi, un-employment sutkianna tha tak a nih a rinawm bawk. 
Tuna ruahman mekte hi kalpui theih a nih phawt chuan, “Kan fel tawh dawn” tih hi LR&S department chauh lo, mipui tan pawh ‘fel duakna’ tur a nih a rinawm. Department dangte pawh hian ‘kan fel tawh dawn’ han ti ve sap sap se, Mizoram hi a fel duak mai dawn a ni.