Kan hrek belh chuan Russian economy a tluchhe dawn – US

Kan hrek belh chuan Russian economy a tluchhe dawn – US
US Treasury Secretary Scott Bessent-a chuan Washington leh European Union ten Moscow atanga tuialhthei thlitfim loh leitu ramte na zawka an hrek chuan Russian economy chu ‘a tluchhe dawn’ niin Pathianni khan a sawi.
NBC News-in an kawmnaah Bessent-a chuan President Donald Trump-a leh Vice President J D Vance leh European Commission President Ursula von der Leyen te chuan thil tam tak an sawi ho nia sawiin Zirtawpnia an inbiak tawhnaah pawh US leh EU-in na zawka Russia nawr dan tur an sawi tih a sawi.
Trump-a sorkar hian India pawh Russian tuialhthei a lei avangin a ram atanga bungrua a lak luhah 25% tariff a laksak bakah a hrem nan 25% dang a lak belh leh a, New Delhi laka chhuah a lak hi 50% ni tawhin August 27 atang khan hman tan a ni.
Treasury secretary chuan US chu na zawka Russia nawr turin a inbuatsaih mek tih a sawi a, “Mahse, kan European thawhpuite hian kan hnung an zui ve a ngai a ni,” a ti.
“Tunah hian eng chen nge Ukrainian sipaite hi an tan theih dawn tih leh engtia rei nge Russian economy hian a chelh theih dawn tihah kan intlansiak mek a ni,” a ti.
“US leh EU an chet leha hrekna na zawk kalpuiin, an tuialhthei leitu ramte lakah tariff sang zawk kan la leh a nih chuan Russian economy hi a tluchhe vek ang a, President (Vladimir) Putin-a pawh dawhkana thil sawiho turin a lo kal ang,” a ti.
Trump-a hian a hmain India-in Russia atanga tuialhthei ‘tam tak’ a lei thin chu ‘a pawi tak zet’ tih a lo sawi tawh.
“India lakah tariff sang tak kan la a, 50% zet kan la ta a. Prime Minister Narendra Modi-a nen pawh kan inthian tha a, pa ropui tak a ni a. Thla tam la liam lovah khan he hmunah ngei pawh hian a lo kal a ni,” tiin Trump-a chuan Zirtawpni khan a Oval Office-ah a sawi.
Hei hi president hian kum 20 chuang chhunga India nena an inkar a zau ber lai thleng mek karah New Delhi nena an inkar tihthat leh tumin hma a la dawn em tih chungchang a sawina a ni.
Trump-a sorkara mi pawimawh zingah, Bessent-a leh Trade Advisor Peter Navarro-a telin, India-in Russian tuialhthei a lei hi Moscow-in Ukraine a rûn meka puitu, sum an tuakna pawimawh tak niin an sawi a ni.
India chuan US-in an bungruaa chhiah sang tak a la chu ‘dik lo leh chhan tha awm lo’ tiin a sawi.
Russian tuialhthei thlitfim loh tam tak a lei chungchangah hian India chu a dinna ngaiah dingin a thil lei hi a ram tana tha ber tur leh sumdawnna a kalpuia a inkhaidiat rem feltu pawimawh a nih thu a sawi.