“…kan hriat loh karah ral lam kan pan..”

“Khawvel hmasawnna chak taka kal mekah keini Mizote pawh kan changkang chho ve zel a. Hetih lai hian hnam changkang zawkte tih dan entawna mahni hnam nun zia zahpui emaw, hnama chiang lo leh kalsan duhna rilru pu tam tak a awm theih a. Khawvel kalphungah mahni hnam zia leh chin dan kalsan hi hnam ral zia a ni a, kan hriat loh karah ral lam kan pan tih hi kan hriat thar a pawimawh hle a ni”.
Hei hi art & culture minister Pu C. Lalsawivunga thusawi a ni a. Kar kaltaa Lungleia ‘Folk Dance & Music Festival 2025’ a hmanpuinaa a sawi a ni a; a serious khawp mai.
“…kan hriat loh karah ral lam kan pan..” tih hi a taka kan tawn mek niin a lang. Khawvel changkanna kan seng lut mek a, thil tam takah chak takin hma kan sawn phah a, a lawmawm; chutih rual chuan, heng hmasawnna rual hian hnam ziarang hi zawi zawiin a bo ve tial tial a ni tih hre chhuak lo hian kan pil vang vang mai ang tih hi thil hlauhawm tak a ni ta.
Sawi tur tam tak a awm ang a, chung zinga a pawimawh hmasa nia lang chu tawng hi a ni awm e. |awng tih hian hming thlengin a huam thei ang a. Kan ti ti na leh kan thuziak, kan thusawi, kan thu leh hla, ennawm (cinema/movies) kan siam danah thleng hian, tawng dang hian hmun a chang tamin a chang thuk leh tan ta hle niin a lang a. Hei hi Mizo thu leh hla humhalhtu pawl ten an vei tih pawh kan hretlang a. |awng lam mithiamte chuan Mizo tawng hi hetiang zela a kal chuan tawng thi/ral thei dinhmuna ding mek a ni, an ti a. Kan thalai thenkhat zingah, an hming atanga Mizo an nih leh nih loh hriat hleih theih loh tam tak an awm chho mek a, hengte pawh hi ‘hnam ral zia’ zinga chhiar tel theih a ni ang.
Thlahtute atanga chhungril nihna kan chhawm chhoh zel nia kan sawi thin heng tlawmngaihna, rinawmna, taimakna, huaisenna, inpeizawn tel telna, sem sem dam dam.. etc. te pawh hi a thu chuan kan la sawi ri reng a, infuih nan kan la hmang sauh sauh a, ngaih pawimawh pawh a hlawhin, chhawm nun zel pawh kan tum, hemi kawnga thawh hlawk tak YMA pawhin hnam zia chhawm nun zel tumin tan pawh a la reng; chutih karah chuan zawi zawiin thil engemaw hi chu a inher danglam hret hret mek a, ‘kan la tha viau’ emaw kan intih lai hian ‘kan lo tha viau tawh lo thei’ tlat a ni.