Kan moral eichhetu a thlawna dawn hi kan malmak dawn – CM

Mizoram mipui moral tichhetu a thlawna sem leh dawn chu an sawrkar chuan a malmak dawn tih chief minister Lalduhoma chuan a sawi.
Sawrkar laipuiin industry-te hmasawnna atana hmalakna tur a duan – Raising and Accelerating MSME Performance (RAMP) chu Mizorama kalpui turin Commerce & Industry department chuan bul a tan a, Nilaini khan chief minister hian a khuhhawng.
Industry chu economy innghahna pawimawh a nih avangin miin theihna a neih phawt chuan hma la se, mihausate pawhin thianho leh pawl (company) angin industrial unit, service sector unit din chur chur se an duh tih sawiin, “Theihtawp kan chhuahpui anga, industry lama harhna thlentir kan duh. Amaherawh chu sawrkar tanpuina chauh beisei, hlawhtlin tum tak tak lo, a thlawna sum dawnna tur emaw ti tan erawh ‘Bui lung tawk ang’ hlauh kan ni dawn a. Kan moral eichhetu a thlawna sem, a thlawna dawn hi kan malmak dawn,” a ti
Covid19 lengah industry-ten harsatna an tawk nasa a, chak zawka hma an sawn leh theih nan sawrkar laipui chuan RAMP hi a duang tih chief minister hian a sawi a. State-te chu mahni mamawh ang zawnga guidelines duan a phalsak angin, Mizoram mamawh leh sawrkar policy milin a kalpui dan tur an duang a, a hmingah MSME Elevate Mizoram (MEMiz) an vuah tih a sawi. Industry neisa leh ding chho zel tur ten tangkai taka an chhawr turin Facilitation Cell an din tih a sawi a ni.
Sawrkarin Hand Holding Policy leh central scheme ho kaikawpin nasa takin hma a la dawn tih Lalduhoma hian a sawi a. Sawrkar hlimah Mizoram Investment Policy 2024 an siam a, tangkaipui tur investor an dap zui a. Mizoram State Industrial Policy 2012 ennawn mek a ni bawk tih a sawi.
“He policy hnuaiah hian State Incentive Subsidy Scheme awm mah se, hun rei tak sum dah a lo ni ngai tawh lo a. Kan sawrkar veleh khan SIS-ah hian nuai 42.31 chu revised estimate angin kan dah a, tun sawrkar kumah nuai 42.31 tho dah leh a ni,” a ti.
Sawrkarin state dehchhuah thil chawilar a duh avangin The Mizoram Preferential Store Purchase Rule tha taka kalpui a tum a. Tualchhung industry-ten an hlawkpui a beisei tih a sawi. Sawrkar office-te chu an bungrua thlak a tul hunah Mizoram thilsiama thlak tawh turin an ti tih chief minister hian a sawi a ni.
Commerce & Industry minister F Rodingliana pawhin kamding nih aiin mahni kea ding nih kan rilruk ngam a tul tawh a, midang thuhnuaia awm loa mahni thu anga hna thawh a, pension awm ve lo, tu leh fate thlenga chhawm thei eizawnna a ni tih a sawi. Uar takin entreprenuership an kalpui dawn a, industry-te mamawh power siam chhuah thlengin an bei dawn tih a sawi a ni.
Tunah hian MSME sumdawnna unit 34900 vel Mizoramah an awm a, a zatve aia tam hian Udyam registration an la nei lo a ni.