Kan NIL reng hi…

MZP-in HSLC 2025 top 10-a Mizo tlingte chawimawina hun an buatsaih hmanpuitu home minister chuan, zirna lama India ram huapa hna lian chelh pha kan tlem lutuk chu a veiawm takzet tih sawiin, Mizo zingah All India Services (AIS) direct-a tling kan tlem zel chhan hi thalaite kan nuamsa lutuk ta em tih ngaihtuah a awl tiin a sawi a. UPSC civil service exam-a tling Vaiho zinga tam tak chu engineering leh medical degree nei an ni thin tih sawiin, Mizo nula leh tlangval technical course zir zote chu state sawrkar hnuai ringawta lungawina zawng lo tura a duh thu a sawi bawk.
Home minister-in a sawi hmangin, Mizoram atanga IAS tling hnuhnung ber kha 2014 a ni a, IPS phei chu 1995 niin Indian Foreign Service pawh 2005 kha a ni a, kan Nil rei ta ngar ngar hle a. Hetih lai hian, kan thenawm state, a bikin Manipur atangin kan Zohnahthlakpuite erawh kum tin an la tling ve thung.
Hetia han ngaih mai hi chuan, kan education standard/quality avang hi a ni thei mai lo maw tih ngaih dan a piang thei a. Mahse, kum 1960 chho bawr vela All India Service-a inhlangkai kan mi hmasate kha, an hun lai khan Mizoramah zirna a la changtlung lem lo a, tun lai dinhmun nena khaikhin phei chuan, infrastructure leh facility te kha la changtlung lo tak kha a ni a, mahse chuti chung chuan kum khatah a rualin pathum pali te an tling thawt thawt thei tho a nih kha.
Kan mi hmasaten All India Services-a an tlin theih chhan an sawi zinga pakhat ‘tumruhna’ ang kha tun lai kan thalaite hian an nei ta lo nge, kan education system hi tuaithar a ngai ta zawk em ni ang, tih zawhna a piang thei awm e.
All India Service-a kan Nil reng mai hi, a eng ber hi nge kan mutan ni ang tih hi chhui chian a, zir chian a, a ‘finding’ azira kan inher rem a ngai hial tawh awm e. Central Services-ah pawh lut kan awm mang lo te hian, kan thalai lehkhathiamte khawvel hi a zim deuh chu a ni lo maw tih ngaihdan a piantir thei bawk.
Eng pawh ni se, hei hi a chhan leh a vang hriat tuma kan chhui chian deuh hi chu a tul viau a ni.