JC.Zoremi Hmar Joute
-- Advertisement --
An lo va hlu êm! Kan hnung deuh khan Zoramin kan hun tawng tawh zinga chhinchhiah hlawh ber pawl ni tawh tur, harsatna lian tham zet kan han tawk ve kha a ni a, kan kut hna thawktute hi an lo va hlu êm tih ka ngaihtuah chiam. Râlmuang leh nunphung pangngaia kan awm laia eng teh uala kan ngaih loh, thil nih dan pangngai anga awm ve mai ang leh ngaia kan neih liam thin, Aizawl hmun hrang hranga thlâi hnah leh rah te, kan ei leh in tam tak, bazar leh zâr lova kan lei thinte an han reh duak mai zet kha chu(h), vêng mawng pahmei chhungkua atanga sawrkar officer lian thlengin, behlawi têl leh zawngtah, maian têl thlengin kan inawhfîk suau suau mai a nih kha!
Kha covid 19 khan ngaihhlut tur dik tak, ngaihsan phûte ngei hnenah an chanvo rawn pe-in, kan tana an pawimawhzia a rawn lantir niin ka hria. Thingtlâng lama kan unau ten he hna hi lo thawk lo ta se, kan nunna atana pawimawh ber ei leh inah kan rethei hle dawn a lo ni tih te kan hre chhuak ta alawm tiraw hei. Phai lam atanga kan châwk luh thin thlai thenkhat dan chah lo ni ta se tih thu-ah, kut hna thawktute kan thlamuanpui a, mahni inchâwm thei lo state kan nih hre kur chunga kan innghahna chu kan buh leh thlâi chîngtute, thingtlang mite bawk an ni. Thingtlâng ngawr ngawr chauh ka sawina a ni lo va, Aizawla chêng mi tam tak hi kut hna thawka eizawng kan ni ve tho mai a, chuvangin kut hna thawktute kha chu ka huam vek che u a nia.
Hah takin, a sûr a sa hnuaiah, ni tin kâwla ni chhuak chhiarin an feh chhuak a. Leia luh an tum ta mai emaw tih tur khawpa rimin sa dâi êk an ham a. Khawpuia an rualpuite aia lang tar báwih khawpa mahni taksa pawh duat thei lovin nang leh keia ei tur buaipuiin an hmanhlel a ni. Sawrkar atanga tanpuina, lei tha atanga rannung kahna hlo, thlâi chî te, an mamawh hrang hrang awm thei ang ang te chu an lawmna tawk a ni a, lawm takin an hmang a, hlim takin an tuh rah an seng a. An chan tawkah lungawiin, hnam taima kan nihzia lantirtu an ni. Titi leh nunphung, tawngkam leh kawng hrang hrangah pawh keini teh thlâwt ai chuan thingtlanga kan kut hna thawktute hi an la ‘zo’ zawk fê a, ngainatawm tak an ni.
Khawpui in chhûng dâi atanga an thlâi thar sa lo lei a, chumi khaw thingthupui chu a khâ, chumi khaw ta chu a kha lo tih vel mai mai kan lo sep liam puat puat lai hian hrûk sên loh thlantui bual nuaihin ni tla vanvuaiin an thawk a, a khâr chhâwng lamin hlawh chhe tê neiin an lo la ve leh a, in ti to lutuk ti-a kan lo dawn vak vak thin te hi ngun taka ngaihtuah chuan zahthlâk deuh mai a ni; an hah a nia aw. Mizote hi Mizo kan la nih chhung chuan hêng kan thlâi, hnam dangin an ei ve tho leh ei nachang an hriat ve loh thleng hian kan hrawk a fah ber kumkhua dawn; anhnah tel miah lova kâr khat chaw ei hi huphurhawm deuh mai a ni.
Mizo zin reng reng, an kal hlat poh leh behlawi bai an ngâi a. An châm rei poh leh an bekang um châk a na mai a ni. Zopa chawei dawhkan dik tak maia kan chawhmeh bik ei hi alawm, dam man a awm ti-a kan iakpui kan iakpui ni. Dâl chauh emaw, alu chauh emaw ring dawn ta ila, kâr khat hi kâr hnih tlukin a rei dawn!
Sawrkar lam pawh, a sawrkar apiangin an ngaihsakin an chhawmdawl fan fan a. Ram leh hnam humhalhna kawnga thil pawimawh tak a nihzia hi an hre hneh viauin ka hria. Duhsakna awm thei ang ang, a sum leh pai emaw, a sangha note, a thlâichî ang zawng pawhin ni rawh se, duat leh ngaihsak an phû em em hian ka hria a ni. Hetih lai hian a châng chuan an hahpui ang hû hian han thatpui tham, dinhmun sâwi danglam ve deuh thei tur khawpa chhawmdawlna tha hi an la dawng lo niin ka lo hmu ve a. State economy châwi kân chu sawi loh, anmahni dinhmun châwi kâng tur pawhin an inhâi kaw zo meuh lo chu a ni a, an hah ngaihtuah hian hamthatna an dawng tlêm ni tein ka hmu fo mai. Bana kaih policy an duang a, hei pawh hi chhenfakawm em em tura ngaih a ni.
Hetianga hah taka kut hna thawktute ‘hei ha’ dap dap ri hian kan sawrkar thar chhuanawm tak beng lo tùntir se la, kut hna thawktute dinhmun pawimawhzia hre thar lehin, kan sawi fo thin intodelhna atana hma tâwngtu pawimawh ber an nihzia hre thar lehin tha thar thawh a, kut hna thawktute tâna thil phal a, ngaihsak hi state economy tisâng thei tur hmasa ber a ni tih hria a, tan la sauh sauh turin ka han ngen ve e. Chutih rualin kan sawrkar tharin lo neitute thlai thar, Sawhthing leh a dang te leisak an tum thu an sawi pawh kha kan la hre khiau a, an thutiamah dingin an ti ngei turah ngaiin beisei ila.
Mipui lam pawhin social media lama thingtlang lam, hmusit ang zawnga chhaih fiamna lam chi hi, fiamthu ti zel mah ila phawrh tam loh a fuhin ka ring. Khawpui mite thlâi leh kan tui tih zawng apiang min chhawptu chu thingtlâng mite an ni a, kan lo leisak khan an thawh hah rah an seng tihna a ni ve mai bawk a. Infiam chiam chiam a, indêu fiam tur kan awm lo ve ve, kan inmamawh tawn a ni tih hi i hre reng ang u. Thlai zuarte pawhin leisaktu tur min mamawh ve tho avangin, a lova luak chhuaka mahni thlai thar tih to chu a zo zia lo va, a Mizo lo tih an hre ve thovin ka ring e.