Kan thil phutah kan inlungrual – ITLF

Kumin May thlaa Manipura tribal leh Meitei inkara buaina a chhuah hnua, tribal-te inzawmkhawmnaa din Indigenous Tribal Leaders’ Forum (ITLF) chuan Manipur-a Zohnahthlakte chu administration hran nei tur leh tuna movement hrim hrimah pawh an inlungrual tha tih an sawi.
ITLF hruaitute hian Ningani tlai khan Aizawlah thuthar thehdarhtute an kawm a. August 9-a Delhi-a Union Home minister Amit Shah leh ITLF inkawmna chungchang an sawi. Kumin May 3-a tribal leh Meitei inkara buaina a chhuah hnua Zohnahthlak thite ruang phum an tumna hmun chu sawn tur leh hmun dang remchang zawng turin Home minister hian a ngen a. Hei hi a hruaitu lam chauhin an tih tluk theih ni lo, mipui inrawnkhawm ngai a nih avangin sawn an tiam thei lo. Manipur-a haw leh phawt a, inrawnkhawm huaihawt a, chuta an thutlukna chu Home minister hi hrilh leh an tiam.
Point 10 an sawi ho zingah, ruang phumna tur bakah remna zawnga inbiak chungchangah an thu a inhmu thei lo bawk tih an sawi. Amit Shah hian, buaina reh phawt se, politic thila tribal-te duhdan chu sawiho theih a nih thu a lo hrilh laiin, ITLF lam hian politic thila an duhdan chu tihhlawhlin phawt nise, buaina hi a reh zui theih zawk an rin thu an sawi ve thung.
Point pariat dangah inremna deuh an neih leh theih chu, tribal chenna atanga Manipur police commando te luh tir loh a ni a. hei hi Union Home minister hian an ministry tih theih piahlam deuh niin, an tih theih chu, central force-te tel chauha kaltir a ni a, chu erawh tih a nih tur thu a sawi.
A bak thil dangah chuan harsatna awm loa tihfel theih a ni tih ITLF hruaitu hian an sawi a. Chu’ng zingah chuan, buaina chhuaka Zohnahtlak thi, tuna Imphal-a an ruang awmte chu tute nge an nih tih chian a, an chenna hmun theuha phurh thlen; Lamka to Aizawl bakah Lamka to Moreh helicopter service tir; buffer zone-a central force chauh dah; tuna relief camp phuahchawpa awmte tan chenna tur hmun nghet zawk din; Imphal-a zirna in hrang hranga tribal Zo-Kuki zirlaite state danga an luh theih dan dap; Lamka-a judicial inquiry office hran dah, tih ah chuan Home minister hian tih sak a tiam a. Imphal jail-a tribal tangte himna atan hmundang jail-a dah tih chu, tun dinhmunah an himna derthawn thu hriat a nih loh avangin, a tul anga hma lak zui chauh tura thu dah a ni bawk.