SASCI sum hman dan ‘election oriented’ a ni ang tih hlauhawm – MPCC treasurer

Mizoram sawrkar sum hman dan tute emaw in chu neih belh zel an tumna avanga bat belh zel a ang tih Congress treasurer Dr Lalmalsawma Nghaka chuan sawiin, sawrkar laipui ruahman Special Assistance to States for Capital Investment (SASCI) pawh inthlana tlin leh tum rana hman mai mai a nih a hlauhawm tih a sawi.
MPCC treasurer chuan The Indian Express chanchinbu tarlan danin, Mizoram chu state sum thawhchhuah (Gross State Domestic Product) atanga chhutin state leh union territory zingah leiba ngah ber a ni, tiin, finance changtu chief minister Pu Zoramthanga chu sum enkawl thiam a ni lo tih a lan thu a sawi.
“Mizoramin thusawi thiam ringawt ni lo, sum enkawl thiam hruaitu a mamawh a. Sum hmanna tur dik taka an hman loh vangin leiba a pung. Central atanga Mizoramin sum a dawn pawh mipui hnen a thleng phak lo,” a ti.
Mizoram sawrkarin sum a bat belh zel dan chu, hmasawnna tur, hmuhlet leh theih tura hman puk aiin, nei tawh sa ten neih belh zel dan an dap avanga puk a ang tih Dr Lalmalsawma hian a sawi a. SASCI pawh centre-in ‘investment’ atana a ruahman ang ni lo, election oriented taka hman nia a lan na tam tak a awm tih a sawi bawk.”Leiba rulhna’n leiba dang a insiam belh zel avangin Mizoram chu MNF sawrkar hnuaiah leiba thangah a tang mek a. Tuna kan mamawh ber chu, ram hruaitu sum enkawl thiam, enchhin pawh ngai lo, mi rintlak leh mi dik MPCC president Lalsawta a ni,” a ti.
State nih atanga kum 30 chhunga Mizoram leiba neih chhoh tlingkhawm leh MNF sawrkarin kum 5 chhung leka leiba a neih belh zat chu a intluk thuak tawh tih MPCC hruaitu hian sawiin, sawrkar kum kal mek budget-a Mizoram leiba tur zat chhut chu cheng vaibelchhe 13557.32 a ni a. Kum 2023-a Mizorama mihring awm tur zat (projected population) 1370000 atanga chhutin, nau piang hlim pawhin Rs. 98958 leiba nei nghal ang zel an ni tih a sawi a ni.