Kan thutiam kan tihlawhtling thin : Kharge
Lok Sabha inthlan hmain Congress president Mallikarjun Kharge chuan April 3 khan new Delhi ah ‘Gahar Ghar Guarantee’ initiative tlangzarhna a nei a. He hmalakna hnuaiah hian India rama chenna in vaibelchhe riat te tlawhchhuah veka ‘guarantees’ te hrilh hriat vek tum a ni.
Kharge chuan Usmanpur, Kaithwada, North East Delhi Parliamentary Constituency atangin hmalakna tlangzarhna chu neiin ‘Paanch Nyay Pachees Guarantee’ pamphlets a sem chhuak a. “He guarantee card hi mipui te hnenah kan Panch Nyay Pachees Guarantee kan kalpui tur hriattir nan kan sem a ni. Ram pumah chenna in vaibelchhe riat kan luhchhuah dawn a ni” tiin a sawi.
“Congress leader leh worker te chuan he card hi chenna in tinah an keng ang a, an sem dawna kan alliance sorkarin thuneihna kan chan huna kan tihturte mipuite kan hrilhfiah dawn a ni” tiin a sawi.
Congress-te chuan inthlan auhlaah ‘Paanch Nyay’ or five pillars of justice – Yuva Nyay’, ‘Naari Nyay’, ‘Kisaan Nyay’, ‘Shramik Nyay’ leh ‘Hissedari Nyay’ te hmangin an kalpui a, heng nyay tinah hian guarantees an siam bawk.
April 5 hian Congress-te chuan Lok Sabha inthlan atana an manifesto tur tlangzarhna an nei dawn a, a tuk lawkah Jaipur leh hyderabad-ah mega rally an hruaitu lawk ten an nei bawk ang. Hei bakah hian slogan thar #HaathBadlegaHalaat tih chu an poll symbol kutphah sawina chu social media paltform-ah an thehdarh nasa tawh bawk.
‘Kan tiam kan tihlawhtling thin’
Kharge chuan Prime Minister Narendra Modi chu sawiselin, “Keini chuan kan sorkarin mipuite tana a tih ngei tur guarantee kan siam thin a, kan tihlawhtling bawk thin. PM modi chuan ‘Modi ki Guarantee’ a ti a, mahse a guarantee te chuan mipui a thleng ngai lo” tiin a sawi a.
Prime Minister hian kumtin thalaite tan hna vaibelchhe 2 siam a intiam a, mahse mipui ten hna an nei reng reng lo. “Ram mipuite hnena kan sawi duh chu kan thutiam kan tihlawhtling thin tih hi a ni” tiin Kharge chuan a sawi bawk.
Congress chief chuan an sorkar hmasaah pawh guarantee an siam te an hlen ziah thu leh an promise ni miah lo MGNREGA, RTI, Right to Food leh Right to Education te thlenga an tihhlawhtlin thu a sawi bawk.
Income Tax thuneitu tena Congress te notice an pek chungchang pawh sawiin Kharge chuan, “He BJP sorkar hian min tihthaih tumin chet an la a, I-T dept chuan kan funds Rs 135 min laksak a ni. Hetiang hrep thleng chung hian democracy ramah inthlan thianghlim tak leh dik taka neih theih a ni dawn em ni?” tiin a sawi a.
Mipuite chuan democracy an duh a, Constitution humhim an duh tia sawi bawkin, “Anmahni buma kaihruai dik lo tute mipui ten an vote hi eng vang nge ka hrethiam lo” tiin a sawi bawk.