Kan ti ang kan tih chu kan tihlawhtling thin – CLP leader

Congress party chuan inthlan hmaa an intiamna, an tih tura an sawi chu an ti hlawhtling thin tih Congress Legislature Party leader Zodintluanga Ralte chuan a sawi.
Thorang bialtu MLA leh he biala Congress candidate Zodintluanga chuan Ningani khan a bial chhunga Sesawm, Laisawral leh Marpara khua a tlawh a. Congress party chuan NLUP cheng nuai 1 an sem dawn, tia an sawi angin an sawrkar tuk lawkah party inthliarbik awm loin, mi nuai chuang hnenah cheng nuai 1 an sem mai a. MNF party-in sawrkar an chak lutuk avanga mipui bum nan SEDP cheng nuai 3 sem an intiam bakah NLUP hmu tawh zawng zawng pawh an pek leh vek tur thu an party president-in a sawi avangin sawrkarna an chang a, an sawrkar hun tawp dawn lamah mi tlemte te hnenah Rs. 25000 vel an sem thei tawk a, mipui tam tak an ti beidawng tih a sawi.
Hetianga mipui an beidawn em em lai hian MNF chuan SEDP sem leh tur anga thingtlang lama nasa taka thu an than tir leh phei chu a pawi takzet tih a sawi a ni.
Congress party-in sawrkarna an chang leh a nih chuan, tang puihna hmangin thalai, nu leh pa leh upa lam thlengin puih tlaka hna thawk an nih phawt chuan, cheng nuai 2-a an puih vek tur thu Zodintluanga hian a sawi a. Tan ngaihna hre lo te puihna tur pawh an duangfel vek tawh tih sawiin, “Congress party chuan kan ti ang, kan tih chu kan ti hlawhtling thin a, tang puihna cheng nuai 2 pawh hi Mizoram mipui bum nan kan hmang ve dawn lo,” a ti.
MNF-in kum 5 chhunga Mizoram an sawpchhiatna zawng zawng leh, mipui min tiam tam takte kan hriat vek avangin mipuiin kan paih fel tawh niin Congress MLA hian a sawi a. ZPM pawh inthlan hmachhawn hma in a vawrtawp an thleng tawh a, social media lamah thudik lo vawrhdarh leh tawngkam dengkhawng tak taka hman bak tih theih an nei tawh lo tih a sawi. “Chief minister atana an zawrh ber pawh nimin lama a thusawi leh vawiin lama a sawi a inkawkalh nei nuai tawh a, a fing apiangin ZPM an chhuahsan hmasa a, ram kaihruai turin mipuiin sawrkarna an pe dawn lo,” a ti.