Kan vote share a pung zel – BJP president

Mizorama inthlanah vote tla zawng zawng atanga chhutin BJP vote hmuh zat a pung chho zel tih BJP Mizoram president Vanlalhmuaka chuan a sawi.
Thawhtannia an State office-a inkhawmah BJP president chuan an vote share pung chho zel an lawmna a ni tih a sawi a. An ni chu smuggling-a innghat party an ni ve loa, kuhva tawlhru thinte titawp tura intiam a, titawp leh theilo ang party an ni ve lo tih a sawi.
BJP chuan manifesto-a an dah, Zoram tana chhenfakawm tak tak an sawi thin chu Mizoram tana an tih tur pui ber a la ni reng a, hriselna tha leh eizawnna tam tak Mizoram mipui pek a, intodelh tir chu an tum ber a ni tih Vanlalhmuaka hian a sawi.
“Mipuiin kan tihsual chu, kan ramin a mamawh pe theitu leh ngaihtuahsak theitu lam hawi loa, a ngaihna hrelo lam kan hawi tlat thin hi a ni. Mahni ram cheina tur eiru duh tam tak awmna state kan ni hi a pawi a, kan awmna tlang sang mah se, keimahni avangin ringlo mi tamtakin Pathian an fak thei lo,” a ti.
Mizoram sawrkarin tum mumal tak neiin, mipui hmaa an intiamna angin ti thin ni se, heti mai zawng kan ni lo tur tih BJP hruaitu hian a sawi a. Tunhma atanga sawrkar tawhte min kaihhruai thin anga vawiin thlenga kan la awm chu vanduaithlak a tih thu sawiin, “Kan ram mamawh tam tak nei loa kan la awm ta reng hi a pawi a. BJP erawh manifesto-a inziak tihlawhtling thin party kan ni tih hi Zoram mipuiin min hriatpui turin kan ngen a ni,” a ti.