KAN ZAHAWM THEI

JC.Zoremi Hmar Joute

Aizawl khawper ang reng, Aizawl atanga hnâi te te-ah hian khua an awm fir fér a. Khaw lian tak phei chu an ni hlawm lo nâin, khawpui mite hian hêng khuate atang hian entawn tur kan nei hlawmin ka hria. Thawmhnaw chungchangah te, ei leh in, kan thil neih te chu a inthlâuvin a inthat hleih ang tih chu thil chiang sa mah ni se, tluk lohna kawng tam tak kârah, fâina chungchangah bik hian kan tluk lo viauin ka hria.
Hman deuh khan Sialsûk khuaah kan va kal a. An khaw làrpui tlâng, Sialsûk tlâng an tih maiah te va kalin thlâ te kan va la chiam a. A va êk dawng zawng te, chhoh melh, phei melh leh melh hrang hrang te, lunglèn hmel deuh atanga motor rûi ang deuh te pawh a ni ang; pawsi hrang hrangin thla kan la nasa ngang mai. Kan thlalak thu hi ka sawi tum ber a ni lo va, mak ka tih em vanga ka ngaihsan hâw riauna thil a ni, sawi ka tum ni.
Saw tiang khawpa tlâng zâu leh a then lâi phei chu âwih bakbahài, hmun hrang hrang atanga tlawhtu nei châwl mang lo, lûn em em mai ni si, saw tiang em ema an vawng fai saw ka ngaisang lo phal lo! Kan nui uarh uarh a, kan lo ngaihtuah phâk miah loh thil, a hmuna kan hmuh leh hriat chauh chu kuhva eina chinai paihna tur takngial pawh a lo awm lo a lo ni a! Bawlhhlawh bawm an dah fel thlap chu eng tiang pawhin kan awmna atangin hlâ se, kan pan nàl nál mai a ngai; paih ngawt theih a ni lo, a fai lutuka kan zak!
Kan awm reng lai chuan nufa ni awm tak hi an lo chho ve hnèk hnék a. ‘Eng nge maw an rawn tih ve dawn ni, an rawn lêng ve hrim hrim nge, eng atan nge an bag ruak hnuh khu an hman dawn le’ ti rilru neuh neuh chung chuan ka lo thlir reng a. Umm…tlanga bawlhhlawh awm ang ang an rawn vãi a lo ni! Bwlhhlawh zawng chuan an tei rek rek a, chhar tur a mual mual chu an hmu ve tho chuan ka hre na a, an chhar hnem lem lo. An vil hneh ngang tih a lang reng mai. Darrokima saw ngaisang viau phei ila chuan a hnenah te pawh han sawi mai ka hreh lo va. A intithei vel lutuk tur ka hmu peih vel lo, umm…kan hrilh lovang!
Thênzawlah pawh ka va hawi hmelchhe ve fé tawh a, khaw fai an ni. Khawlaiah bawlhhlawh kan hmu nual lo. Scooty thar lawm nan leh rilru thawven nan tiin Sâmtlangah thingpui sen hâng ka va in ringawt tawh bawk a, Hnahthel ro pali/nga vel bak bawlhhlawh, sarang leh thil eina kâwr emaw an tlachham ve viau bawk. Zawlpala thlân tlâng kal tur chuan Phulpui kan pal tlang ngei ngei a ngai a, an khaw chhung fai avangin ka chhuang leh ngawt bawk a. Hmuifângah pawh bawlhhlawh chu a zawna zawn a ngai. Muthi tlânga hawi thawveng tura ka kal ni-a ka chhinchhiah haw chu an khaw chhung faizia mawlh kha a ni leh tho. Bawlhhlawh, khawlaia paih tam hi hausakna ni se la chuan, hêng khua ka sawi ho hi chu an rethei hlawm ngawt ang; bawlhhlawh nei hlawm hek lo!
Aizawl vengah chuan ITI khu an fai tih chu kan hre vek ang a, veng hrang hrang han thlir hian chawhrualin Aizawla chêng hi kan che tawp! Kan thalai ten han hawi thawvenna hmun tur an vàn hle a. Biaksailovi duh pawl te pawh an lo awm ve a, chuta an pan khâwm chu Rangvamual khu a ni. Kawngsirah ‘U Biaksailovi’ an rîm a, an inna ruak an hnutchhiah a, an kalsan mai thin. An tawp bik vang emaw a ni bik lo va, paihna tur bawlhhlawh bawm dah a nih loh vang zawk a ni. Khu lai vel khu kan thu neitu deuh hian han ngaihsak lawk se la kan va ti ve! A kala te khuan tawih thei e, thei lo e…an pawisa hlei thei meuh lo a ni si a. A enga pawh chu ni se, bawlhhlawh bawm mumal taka dah a, a enkawltu tur rawih mai te hi thil tha tak tur niin ka hria. Lei min duh em emna hmun a tam si a, fimkhur a tulna hmun tak chu Rangvamual leh Phunchawng te khu niin a lang.
Kan khawpui chhûng ngeiah pawh tuihawk luan kawr vela bawlhhlawh paih mai hreh lo kan la awm. A rim a chhiat chu thuhran ni se, kan tuiluankawr a hnawh a, khawi khawi emawah an insem darh a, keimahni tan bawk phurrit a tling mai thin tih chu kum tin fûr a lo thlen apiangin kan hre zel tih te hi hriat tur a ni…ngawt lo, vei ila, mi tin hian ka ta a ni ti chunga enkawl kan zir a ngai. Ram changkang zawk thenkhatah chuan kawng siam nan plastic an hmang tawh a, leilung tana tha lo thil, tangkai em ema hman dan an thiam bik hi rual awh an tina ngawt mai.
Sawi tawh ang deuh khan kan thalaite hian thianhova han lên khaw thâwn te an châkin an mamawh ve ngawih ngawih a. Kan neih chhun ang te te Hmuifang te, Hlimen park te, Muthi leh Hàngi lunglen tlâng te, Reiêk tlang leh kan tlawh thin hmun tam zawkah hian sulhnu mawi lo hnutchhiah ching kan la awm zeuh zeuh. Heng kan hmun hlû neih ve ang ang te hi vâi ta an ni lo va, Tuikuk leh Naga hovin an rawn thian fo dawn lo; kan ta a ni miau alawm!
Neih tlêm nen, ram dang laka chhuanawm khawpa changtlung an nih loh nâk alai a, a neitu Zoram mipuite ngeiin kan duat loh chuan, tu chuan nge maw rawn duat hluah chuang ang ni; kan ta an ni a, uluk leh duat takin i enkawl theuh teh ang u khai. Hêng hmuna kal thinte pawhin, kan ken luh thil eina kâwr, bûr ruak leh bawlhhlawh hrim hrim him han hâwn leh hrám thin hlawm ila, changkang nihna a ni mai. Tent nen, ‘kan camp e’ kan ti a. Eitur tuihnai tinreng atanga thawmhnaw brand tha tha inbelin, changkan hmel deuhin kan va insawngkawnlawi ve a; kan sulhnu a thing leh tlat thin!
Khawpui chhungah pawh lirthei atanga bawlhhlawh paih chhuah nulh ching kan la awm zeuh zeuh; a thing khawp mai! Sim hmak teh ang u. Tin, kan vântlang lirthei(Public transport)hrang hrangte hi in pawimawh hle. Khawpui chhung fang kual nasa ber in nih angin, in taxi/bus-ah te hian bawlhhlawh bawm chhawp teh u a! “Bawlhhlawh paih chhuak lo hrâm ang u aw,” tih thu tê mai hi han sawi zeuh mai bawk ulangin, hma kan sâwnna a lang rang viau ang.
Hei raw…a pawimawh ber kan sawi dawn e. Faina chungchanga inzirtirna hi, mahni in chhûng aia bul tanna tha a awm lo! ‘Upa lam inzirtir chu a sâwt lo, nunphungah an lo nei tawh a’ kan lo ti rilru thin em! A dik alawm, kum lama upa tam tak chu an hriatna te a lo chak tawk tawh lo ve a ni thei e, mahse kum lama naupang zawk kan fate theuh hi zirtir tawh ang u hmiang!
Thinlung taka fâina kan vei a nih chuan leh, in chhunga kan sawi tam na na na chuan, chu chuan rah tha chhuahin kan fate pawhin an ngai pawimawh ve ngei ngei dawn. Ram changkang tak kan la ni lo, zêp thu chêng lo. Faina hi changkanna lam panna atana rahbi hmasa ber a ni a, fâina hian mi zahawmah min siam thei a, eng ual ni lo mah ila kan ram a fâi miau chuan kan zahawm thei tih thu hian i’n tlip teh ang!