R.Lalhmangaiha @R.Hmaa
-- Advertisement --
A tha lai leh mawi tak tak laite chu awm ve bawk mah se, Mizoram inkalpawhna kawng chhim leh hmar, chhak leh thlangte chu tunah hian nasa takin a chhia a, khualzinte an khawngaihthlak hle a, kawng that laia darkar 3/4 lek leka kan thlen thinna hmunte kha nileng lenga thang a ngai ta.
Tuna kan sawi tur tak zawk chu Mizoram khawpui ber, Mizote Jerusalem Aizawl khawpui chhung kawngte hi a khawi lai mai pawh hi thalai reng reng a awm ta lo.
Lirthei khalhtute leh mipui chu sawi loh, sikul naupang thlengin an phun mur mur mai. ‘Kawng a chhe hle mai,’ tih chu ni tin Aizawla chhuak vak thinte titi pui ber a ni tawh.
Kan ram hruaitute chu motor chhuak thar tha leh man to ber, a sawh zawng pawha nghawr ve dawt dawt loah chuangin kawng khuarah lo insawh ve thin mah se, anni tan zawng a sawh na ve kher lo pawh a ni mahna. Neih thinglung khawnga mi tam zawkin kan neih ve kan lirtheite pawh an khawngaihthlak hle a. Kawng khuarahte hian chetsual palh a awl a, kawng thalai zawnga kawng khuar helna lamah mi vei vak emaw, lirthei dang nena intihpalh tawk lah bo lo. A bikin damlo Hospital pan pui ngaite an ngaihtuahawm zual a, an khawngaihthlak a ni.
Kum 2018 kum tawp MLA inthlanpuiah khan MNF a sorkar a, Mizoram hmun hrang hrang leh Aizawl khawpui chhung kawng chhe lutuk kha an ngai pawimawh hmasa a, a hmaa kawng chhe lutuk zualpui kha chu an siam zo hman.
Aizawl khawpui chhung kawngte hi hmun hrang hrangah a tahtawlin an siam a. Kum 2019 leh kum 2020, 2021-2022 bawr vel khan an siam a, a hun lai chuan a tha thawkhat ve hle a nih kha. A tlangpuiin PWD ho Dan-ah chuan kawng siam hi kum 4/5 hnuah resurfacing tih thin a ni a. Resurfacing hun dawn hnaiah inthlan puan a lo ni leh ta si a, MNF ministry khan a thual nawn hman ta lo a, an sorkar nawn ta bawk si lo a, an tan hmalak chhunzawm a theih ta lo a ni.
MNF khan a sorkar atanga thla hnih thumah kawng kha a siam nghal chur chur mai anih kha. Tunah hian kum dang zawng aia nasain furpui kan tuar a, ruah a tla nasa in, hmun tinah lei a min a, kawng siam hun chu a ni chiah lo ang. Mahse, thla 9 dawn kalphung thar sorkar hian enga tinge furpui lo thlen hma daih khan kawng chhe lai bikte siam tha turin hma a lak loh a, a lo inbuatsaih lawk loh tih hi zawhna pawimawh tak a ni.
Kum 2018 MNF sorkar tirh khan NEDP sum Congress sorkar hman hman loh, cheng vbc 85.95 vel a hnutchhiah kha nasa takin kawng siam nan a hmang a. ZPM pawhin MNF SEDP hman bang cheng vbc 150 kha thlai thar lei nan cheng vbc 110 an dah a, tun thlengin thlai thar an lei lah kan la hre lo a, cheng vbc 40 chu health care-ah a dah a, kawng siam nan a dah ve lo. Kawng siam ngai pawimawh leh ngai pawimawh lo chu an awm deuh a ni.
September ni 7, 2024 khan Sakawrtuichhun YMA Branch hmalaknain kawng siam hnatlangpui neih a ni a, mi 600 vel an thawk chhuak. Hnatlanna atan hian kohhran hrang hrang leh NGO-ten sum thawhin mipuiah vehbur an khawn bawk. MNYF Headquarters huaihawtin September ni 5 khan canteen kual leh a chhehvelah mi 400 vel thawk chhuakin kawng chhe siam hnatlang an nei bawk a. Hnatlanga kawng siam thawm hian sokar hi ko harh ngei se, hnatlanga kawng siam hi ngai tawh lo se tih hi a duhawm takzet a ni.
Aizawl hi kan ram khawpui ber a nih angin state dang leh foreigners lokalten kan ram dinhmun an enna leh tehna ber pakhat a ni a. Tun ang ringawta kawng chhia hi chu a hnam ang pawha mualphona leh thil zahthlak a ni. Dik bik leh tha bik, danglam bik riau tura beiseina sang tak nen mipuiin kan thlan tlin tak kan sorkar thar hian khawpui chhung kawng hi a siamthat thuai loh chuan kan Zotlang ram nuam hian chhawrpial run a iang lek lo’ng e..