Kapil Sibal-an PM Modi chhang let

Prime Minister Narendra Modi-an ‘secular civil code’ a aupui chiam hnuah Rajya Sabha MP Kapil Sibal chuan BJP te chu tun hnai kum 10 chhungin an secular lova an civil hek lo tiin a sawi.
Sibal chuan ‘secular leh civil hi he ramin a mamawh ngawih ngawih a ni,’ a ti bawk a.
Independence Day thuchah Red Fort atanga a sawiah Modi chuan he ramin a mamawh chu ‘secular civil code’ a ni tiin a sawi a. Tuna dan awmsa mek hman lai te chu ‘communal civil code’ tia sawi bawkin inthleibikna a ti bawk.
Modi thusawi hi chhangin Sibal chuan, “PM-in tuna kan mamawh ngawih ngawih chu he ram hian Secular Civil Code a ni a, Communal Civil Code hnuaiah kum 75 kan awm tawh a ti a. Kei erawh chuan tuna kan mamawh ngawih ngawih chu seuclar leh civil ram a ni. Tun hnai kum 10 chhungin BJP te hi an ‘secular’ lova an ‘civil’ hek lo” tiin Union minister hlui chuan a sawi.
Independence Day thuchah a sawiah khan Modi chuan, “He rama mi tam ber tena an rin leh thudik ni bawk chu, civil code te hi a nihna takah chuan communal civil code a ni. Mipuite a thleihrang a ni,” tiin a sawi a. Prime Minister chuan hetiang dan te hian ram chu communal lines-ah siamin chu chu intluktlanlohna thlentu niin modern society ah hmun a chang lo a ti bawk a.
“Ka sawi duh chu India-in a mamawh ngawih ngawih chu secular civil code a ni. Kum 75 chhung communcal civil code hnuaiah kan awm tawh a. Tunah chuan secular civil code lam kan awn a ngai a, chumi hnuah sakhuana behchhana inthliar hranna a tawp ang,” tiin Prime Minister Modi chuan a sawi.