Kar tawp football-a hnuhma
Kar tawp khan tualchhung league hrang hrang khelh chhunzawm a ni a. Kar tawp football a hnuhma lian zual kan tarlang leh ang
English Premier League:
Inrinni zanah champion lai Manchester City chuan Etihad Stadium a an mikhual Fulham chu 5-1 in an hneh a, Fulham an hneh tum hian Erling Braut Haaland chuan hattrick a siam. Haaland hian EPL-ah goal 41 thunin, assist vawi kua a nei bawk a, goal 50-ah a inrawlh tling a. EPL-ah goal 50-a inrawlh tling rang ber a record thar a siam a, record thar siam turin Haaland hian game 39 chiah a mamawh. Tun hma lama EPL record lo awm thin chu khelh 43 atanga goal 50-aa inrawlh tling Andrew Cole a ni.
City hi EPL-ah chawlhlawk hmaa hma an hruaina vawi 46 zetah tlawm an nei lo zawn tawh.
Pathianni zana inkhel hmuhnawm takah Marcus Rashford chuan Arsenal laka Manchester United hmahruaina goal a thun. Rashford hian club lian lakah goal a thun thei viau a, Arsenal, Chelsea leh Liverpool lakah goal a thun thei hle. Arsenal an tum hnuhnung vawi thumah goal a thun vek a. United player zingah Arsenal lakah khelh thum chhunga goal thun zawn vek thei pahnihna a ni a, pakhatna chu Arsenal captain hlui Robin van Persie a ni.
Inrinni zangah 5-2 a Burnley an hneh tumin Tottenham captain Son Hueng-min chuan hattrick a siam a, hei hi Spurs tan EPL-ah hattrick a siam vawi lina a ni a. Tottenham tan hattrick siam hnem ber dawttu a ni a, a chungah hian vawi riat hattrick siam tawh Harry Kane a awm.
Inrinni zanah Brighton in 3-1 a Newcastle United an hneh tumin Evan Ferguson chuan hattrick a siam a. Kum 18 leh ni 318-a upa Ferguson hi EPL-a hattrick siam thei nau pan lamah palina a ni a, c hungah hian Robbie Fowler, Michael Owen leh Chris Bart-Williams te an awm.
Spanish La Liga
Inrinni zanah Real Madrid in 2-1 a Getafe an hneh tumin Jude Bellingham chuan goal a thun leh a. Bellingham hi Cristiano Ronaldo hnu lamah Real Madrid tan an khelh hmasak palina goal thun vek thei awmchhun a ni. Real Madrid hi season tharah vawi li an chak zawn ta chiah a, hei hi La Liga chanchinah season thara vawi hnih an chak zawnna chiah a ni.
Pathianni zan khan Barcelona in 2-1 Osasuna an hneh tumin Gavi chuan Barcelona tan a vawi 100 nan a khel a. Gavi hi Barcelona tan vawi 100 khel tling naupang ber a ni a. European top 5 league zingah 2004 leh a hnu lama piang zingah vawi 100 khel tling thei awm chhun a ni bawk.
Ronaldo 850
Saudi Pro-League-ah Al Nassr in 5-1 a Al-Hazm an hneh tumin Cristiano Ronaldo chuan goal khat a thun a. Ronaldo hian club leh ram tan goal 850 a thun tling chiah a, hnuhma ropui a hnutchhiah a, footballer ropui bik a nihzia a nem nghet nawn leh.