Kar tawp football hnuhma

Kar tawp khan tualchhung league hrang hrang khelh chhunzawm a ni a, football ah hnuhma thar hmuh tur a awm nual. Kar tawp football hnuhma langsar zual kan hruat kual leh ang.
English Premier League
Pathianni zan khan Tottenham Hotspurs chuan Brighton & Hove Albion lakah si hniha hma an hruai zet hnuin tlawm zawkah an tang. Tottenham hi an khingpuite lakah si hnih faia hma an hruainaah vawi 10 zet an tlawm tawh a. EPL-ah si hnih faia hmahruai tawh chuga tlawm ngun ber an ni a, record duhawm lo tak an nei.
Season tharah Manchester United an khel chhe viau a, khelh 7 atangin point 8 chiah an la hmu. Manchester United in 1989-90 hnu lamah EPL match sariha point an hmu tlem ber hun duhawm lo an tawng mek. Manager ropui Sir Alex Ferguson hnuaiah United hi 13-na an lo ni tawh a. Hmei hnua League-ah an hniam leh ber tum an tawng mek bawk. Insiamthat mamawh tak chungin Red Devils hi an insiamtha hleithei lo a, an buai rih viau.
Liverpool chu manager thar Arne Slot hnuaiah an khel tha chhunzawm zel. Arne Slot hnuaia inkhel an hmachhawn 10 atangin Reds hian vawi 9 hnehna an chang der tawh. Dutch manager Slot hi Liverpool manager awm tawh zawng zawng zingah an match hmasa 10-a vawi kua hnehna chang thei hmasa ber a ni.
Chelsea tan Cole Palmer a khel tha chhunzawm a. Season liam ta tan tirh atanga tun thlengin Palmer hian EPL-ah goal 43 a thawkchhuak tawh a. Hemi hun chhungah hian EPL player zingah goal thawkchhuak (goal score & assist) ngah ber a ni a, a hnuai chiahah hian goal 42 thawkchhuaktu Erling Haaland a awm.
Arsenal tan Kai Havertz a chetha chhunzawm zel a, goal a thun tluang zel. Havertz hian Arsenal tan a khelh hnuhnung pali-ah goal a thun zawn a. Tun hi Arsenal tan inelna hrang hrangah game li chhung goal a thun zawn hmasak ber tum a ni a. Club tan game li chhung goal li a thun zawn hmasak ber chu Bayer Levekusen tan niin March – May 2020 chhunga a thun a ni.
Inrinni zanah Arsenal in Southampton an lehthal tumin an player pawimawh Bukayo Saka chuan assist vawi hnih a nei. Saka hian Arsenal tan EPL-ah assist vawi 42 nei tawhin, Gunners tan EPL-a assist nei tam pasarihna a ni a, Robert Pires record a khum chiah. Arsenal tan EPL-a assist ngah ber chu assist vawi 94 zet nei Dennis Bergkamp a ni a. Bergkamp hnuaiah hian Thierry Henry (74) leh Cecs Fabregas (70) te an awm.
Spanish La Liga
Inrinni zana 2-0 a Villareal an hneh tumin Real Madrid tan Luka Modric a inlan a, assist a nei nghe nghe. Modric hian Real Madrid tan inelna hrang hrangah vawi 546 a inlan tling chiah a, Marcelona record nih rualin, Los Blancos tan inlan tam 12-na a ni. Spain player ni lo zingah Real Madrid tan Modric aia khel tam awmchhun chu Karim Benzema chiah a ni.
Pathianni zan khan FC Barcelona chuan 3-0 in Alaves an hneh a, he inkhela awm pathumte hi Rober Lewandoski thun vek a ni. Lewandoski hian Barca tan goal 50 a thun tling chiah a, Lionel Messi (125), Luis Suarez (76), Cesar Rodriguez (65) leh Quini (53) te hnung zuiin kum 30 tlin hnua Barca tan goal 50 thun tling thei zingah a awm.
Alaves laka hattrick siam Lewandoski hi Lionel Messi (January 2022) hnu lamah Barca tan chawlhlawk hmaa hattrick siam leh thei hmasa ber a ni tel bawk.
Inrinni zanah Villareal an hneh tumin Real Madrid tan Federico Valverde chuan box pawn atangin goal a thun. Valverde hi January 2022 hnu lamah La Liga player zingah box pawn atanga goal thun hnem ber a ni a. A hnuaiah hian Antoine Griezmann (7) leh Iago Aspas (7) te an awm.
French Ligue 1
Season tharah Monaco an chetha chho viau a, khelh 7 atangin point 19 an hmu tling der tawh. Kum 1960-61 a an champion hnu lamah season thar match hmasa pasarih atanga point an hmuh tam ber tum a ni. An champion tum kum 1960-61-ah hian match 7 atangin point 21 zet an hmu. Tunah pawh Champion leh an tum ang.