Kar tawp khan tualchhung league hrang hrang khelh chhunzawm a ni a. European top 5 league a thil thleng langsar zual bakah player ropui fal pahnih; Lionel Messi leh Cristiano Ronaldo te kar tawpa an chet dan kan thlir kual leh thuak thuak ang.
English Premier League
Inrinni zan khan English Premier League club lian pathum; Manchester United, Liverpool leh Manchester City te an chak lo rual thawih a. September 17, 2006 hnu lamah zan khata EPL club lian pathumte an tlawm rual leh tum khatna a ni a. Ni 6222 hnuah United, Liverpool leh City te ni khata an tlawm rual lehna hmasa ber a ni. Inrinni zan khan United hi Old Trafford-a an mikhual Crystal Palce hneh lovin an tlawm a. Tottenham lakah Liverpool an tlawm laiin, champion lai City chu Wolves hneh lovin an tlawm ve bawk.
Inrinni zan khan player pahniha tlem zawk ni chungin Liverpool chu Tottenham Hotspurs lakah uiawm takin an tlawm. Spurs laka an tlawm tum hian VAR enkawltute tihsual vangin Reds goal thun pawmsak a ni lo. Liverpool hi khelh 19 chhung zet tlawm an nei lo zawn tawh, Tottenham laka an tlawm kha April 1, 2023 hnuah inelna hrang hranga an tlawm hmasak ber tum a ni.
Inrinni zan khan Arsenal chuan an khingpui AFC Bournemouth chu si li fai ngawtin an hneh. Bournemouth an sawp tum hian Bukayo Saka chuan minute 17-na lekah hmahruaina goal a thun. Saka hian season kal mekah Arsenal tan inelna hrang hrangah vawi 9 khelin, goal kua ngawtah a inrawlh tling der tawh a, a chetha tluang hle.
Manchester United chu Old Trafford-a an mikhual Crystal Palace lakah mak tak maiin an tlawm a, hei hi November 2, 2021 hnuah an muala an tlawm zawn vawi khatna a ni a. Ni 695 hnuah an mualah an tlawm zawn ta chiah a ni.
Spanih LaLiga
Zirtawp zan khan FC Barcelona chuan an mikhual Sevilla chu si khat faiin an hneh. Barca hi Sevilla an hmachhawn hnuhnung vawi 21 ah tlawm an nei lo. Sevilla nen an intum hnuhnung vawi 21-ah hian vawi 18 zet an chak a, vawi thum dang an inhnehtawk. Barca hian an mualah khingpui ngai laka tlawm an neih loh rei pathumna thun an tawng bawk.
Barcelona laka an tlawm tum hian Sevilla defender Sergio Ramos chuan minute 76th-naah an lamah a ti-goal a, hei hi Catalan club lianin an chakpui. Barca an hmachhawn tuma own-goal a neih hi La Liga-ah own-goal vawi thum a neihna a ni.
Inrinni zana Real Madrid in si thum faia Girona an sawp tumin Nacho hnawhchhuah a ni a. Nacho hi Real Madrid tan vawi 316 zet a khelh tawhah vawi khat hnawhchhuah a nihna chiah a ni.
Pathianni zan khan Atletico Madrid chuan an mikhual Cadiz chu 3-2 in an hneh. He inkhelah hian Angel Correa chuan goal hnih a thun. La Liga-ah Correa-a’n Atletico Madrid tan goal a thun vawi 51 zetah tlawm an nei lo va, vawi 43 hnehna an chan laiin vawi riat dang chu an khingpuite nen an inhnehtawk.
Italian Serie A
Inrinni zanah Bologna in si thum faia an mikhual Empoli an sawp tumin Riccardo Orsolini chuan hattrick a siam a. Orsolini hi Searie A season kal meka hattrick siam thei pahnihna a ni a, a hmaa mi hi Lautaro Martínez a ni.
Inter Milan foward Lautaro Martínez hian Pathianni zana Salernitana an hmachhawn tumin bul a tan lova, bench atangin a lut. Hun pumin inkhel hmachhawn lo mah se goal li a thun ta tho thung a. Italian Serie A, season 30 zet kal tawhah substitute ni chunga goal li thun thei hmasa ber leh awm chhun a ni a, record thar a siam. Martinez hian minute 62-naah hmahruaina goal a thun hnuin minute 77, 85 leh 89-naah goal a thun belh leh bawk.
German Bundesliga
2-2 a Bayern Munich leh RB Leipzig an inhnehtawk tumin Bayern forward Harry Kane chuan minute 57-naah penalty a pet goal. Kane hian a club thar Bayern Munich tan hian goal 11-ah a inrawlh tling ta chiah a. England captain hi Bundesliga season tharah goal a inrawlh tam ber a ni mek.
Messi-Ronaldo
Lionel Messi chu hliam vangin Inter Miami tan a inlan thei lo zui zel a. An player pawimawh Lionel Messi tel lovin Inter Miami an talbuai chhunzawm ve zel bawk. Messi a inkhelh theih loh lai hian Cristiano Ronaldo chuan Al-Nassr tan goal a thun tluang zel thung.
Cristiano Ronaldo hian Al-Nassr tan a khelh hmasak 34-nah goal 30 a thun tling der tawh. Al Nassr tan goal 30 a thun hi club tan goal 30 a thun tlin ran lamah pahnihna a ni. Real Madrid tan a khelh khan game 33 atangin goal 30 a thun a, hei hi club tan goal 30 a thun tlin ran ber tum a ni a. Juventus-ah game 48 atanga goal 30 a thun tlin laiin, a chawr chhuahna Manchester United tan erawh chuangame 147 atangin goal 30 a thun ve chauh thung