Kar tawp football hnuhma

International break a ni a, tualchhung football league ngainatute khua a har hle hnuin kar tawp khan tualchhung league hrang hrang khelh chhunzawm a ni leh ta. Inkhel hmuhnawm tak takah hnuhma thar hmuh tur a awm leh nual a, kar tawp football hnuhma langsar zual kan hrut kual leh thuak thuak ang.
English Premier League
Pathianni zana inkhel ngaihven hlawh takah Liverpool chuan Anfield-a an mikhual Chelsea chu 2-1 in an hneh a, table-ah hma an hruai chhunzawm zel. Reds hian season tharah vawi riat an khel tawh a, point 21 an hmu mek. Hei hi 2019-20-a an champion hnu lamah EPL-a bul an tan that ber tum a ni a. 2019-20 season khan an game hmasa pariatah point 24 an hmu.
Liverpool hi an manager thar Arne Slot hnuaiah match 11 khel tawhin vawi 10 ngawt an chak a, Dutch coach Arne Slot hi Liverpool manager awm tawh zawn zawng zinga bul tan tha ber a ni. EPL manager zinga bul tan tha ber chu Manchester City manager ni mek Pep Guardiola hi a ni a. Guardio hian City a enkawl tirh match hmasa 10-ah a chakpui vek a ni.
Manager thar Arne Slot hnuaiah Mohamed Salah a khel tha leh ta viau a, Aigupta tlangval Salah hian match thum chhung chu goal thun leh assist a nei zawn tawh a, season kal mekah hetiang ti thei chu Eintracht Frankfurt player Omar Marmoush nen chiah an ni. Salah hian EPL-ah goal 162 a thun tling chiah a, EPL-ah goal thun tam pakuana niin Jermain Defoe record a nih rual a. Pariatna ni mek Robbie Fowler chu goal khat chiahin a phak lo.
Inrinni zan khan Manchester City chuan si phur hmasa chungin Wolves an hneh. Season liam ta tan tirh atang tun thlengin City hian si phurh hmasa chungin vawi 10 zet hnehna an chang let tawh a. Europe’s top 5 league club zingah an khingpuite lehthal ngun ber an ni.
Season bul tan tha tha, goal thun pup pup reng Erling Haaland chuan Wolves lakah hian goal a thun lo a ni mai lova, minute 90 chhungin ball vawi 13 chiah a tawk. Hei hi Haaland-a’n EPL-ah minute 90 a khelh chhunga ball a tawh tlem ber tum a ni.
Manchester City defender Josko Gvardiol chuan kum 2024 chhungin goal 6 ngawt a thun tawh a. Kum 2024 chhungin Augsburg defender Keven Schlotterbeck nen goal thun tam ber an ni dun mek.
Mimuala khel tha thin tak Arsenal chu inrinni zan khan AFC Bournemouth lakah si hnih faiin an tlawm. Gunners hi kum 2024 chhungin EPL-ah Mimuala an tlawm hmasak ber tum a ni.
Inrinni zan khan Manchester United chuan harsa takin an mikhual Brentford an hneh a, an chakna goal hi Rasmus Højlund thun a ni. Hojlund hian season hmasa tan atanga tun thlengin chakna goal vawi 5 ngawt a thun tawh a, inelna hrang hrangah Bruno Fernandes nen chakna goal an thun zat a intluk chiah.
Spanish La Liga
Champion lai Real Madrid chu tlawm nei lovin an kal tluang zel. Los Blancos hi khelh 42 chhung tlawm nei lovin an kal tluang tawh a, hei hi La Liga-ah tlawm nei lova an kaltluan rei ber tum a ni a. La Liga-ah tlawm nei lova kal tluang rei ber FC Barcelona record chu game khat chiahin an la tluk lova, Barca record an tluk ngei a rinawm hle. El Clasico-ah Barcelona in Real Madrid hnehin an kal tluang lai tihtawpsak ngei an tum ang. Hetihlai hian El Clasico-ah ngei Barcelona record an tluk thei a nih chuan Real Madrid tan a ropui dangdai khawp thung ang.
Inrinni zanah Celta Vigo an hneh tumin Real Madrid tan kum 39 leh ni 40 zeta upa Luka Modric a inlan a, Modric hi Real Madrid tan khel thei upa ber a ni. Modric hian Real Madrid tana khel thei upa ber ni thin Ferenc Puskás (39y-36d) an kum May 8, 1966 a record a lo siam tawh chu a khum.
Real Madrid tan Vinicius Junior a khel tha tluang hle a, Brazilian hian La Liga a khelh hnuhnung vawi rukah goal a thun emaw, assist emaw a nei vek a. La Liga-ah goal thun emaw, assist emaw a neih zawn rei ber tum a ni.
Hmahruai mektu FC Barcelon chu an mualah vawi 10 zet an chak zawn tawh a, an muala an chak zawn rei be vawi 14 khum tumin hma lam an pan.
Pathianni zanah -1 ngawta Barcelona hneh lotu Sevilla in Barca an ngam lo hle am an inkhelh hnuhnung vawi 35-ah vawi khat chiah an chak.
Barcelona striker Robert Lewandoski chuan season kal mekah goal 12 zet a thun tawh a, Europe’s top 5 leagues-ah goal thun hnem ber a ni mek. Lewandoski hian a career-ah goal 366 zet a tjhun tawh a, Europe’s top 5 leagues-a goal thun tam lamah Gerd Muller leh Jimmy Greaves te tlukin pathumna a ni mek a. A chungah hian Lionel Messi (496) leh Cristiano Ronaldo (495) te chiah an awm.
Barcelona tan rawl thar Lamine Yamal a chetha chhunzawm zel a, season kal mekah assist vawi vawi ruk ngawt a nei tawh. Yamal hi Messi hnu lamah Barcelona tan a zawna vawi ruk assist nei leh thei hmasa ber a ni.
Atletico Madrid forward Antoine Griezmann chuan La Liga-ah chakna goal vawi 58 lai a thun tawh a, La Liga-ah chakna goal thun hnem ber a nihna a tizau zual deuh deuh zel.
Villarreal player Daniel Parejo chuan La Liga-ah vawi 500 a khel tling ta chiah a. La Liga-ah vawi 500 khel tling thei 15-na a ni.
Italian Serie A
Inter Milan tan Argentina forward Lautaro Martinez chuan goal 133 a thun tling ta chiah a. Italian player ni lo zingah Inter Milan tan inelna hrang hranga goal thun hnem ber niin Stefano Nyers record a nih rual.
Season tharah Juventus tlarhnung a phui hle a, vawi riat khel tawhin goal khat chiah an la chhuah.
German Bundesliga
Bayern Munich forward Harry Kane chuan Bundesliga-ah hattrick vawi ruk ngawt a siam tawh a. England captain Kane hian Premier League-ah hattrick vawi hnih a siam tawh bawk.
French Ligue 1
Season tharah Montpellier an khel chhe tluang hle a, an game hmasa pariatah goal 26 zet an chhuah tawh a. Kum 55 zet hnuah game hmasa pariata goal chhuah hnem ber an ni a. Ligue-ah game hmasa pariata goal chhuah hnem ber chu 1969-70 season ah game hmasa pariata goal 28 zet chhuahtu Rennes an ni.
Messi & Ronaldo
Inter Miami tan Lionel Messi a khel tha zui viau a, an match hnuhnung berah hattrick a siam. Messi hian Inter Miami tan goal 33 a thun tawh a, Leonardo Campana record khumin Inter Miami tana goal thun hnem ber a ni.
Cristiano Ronaldo pawh Al Nassr tan a duai lo viau. Ronaldo hian Al Nassr tan vawi 54 khel in, goal 55 zet a thun tling der tawh.