Chawlhkar tawp khan tualchhung football league hrang hrang khelh chhunzawm a ni a, inkhel a hmuhnawm leh hlawm viau. Inkhel hmuhnawm tak takah hnuhma thar hmuh tur a awm tel leh nual bawk. Kar tawpa football hnuhma langsar zual kan hrut kual leh thuak thuak ang ang.
English Premier League
Inrinni zanah Crystal Palace nen 2-2 a an inhnehtawk tumin champion lai Manchester City tan Erling Haaland chuan goal khat a thun. Haaland hian season liam ta ta atanga tun thlengin EPL-ah goal 40 a thun a, hemi chhunga goal thun hnem ber a ni. Haaland hnuai chiahah hian goal 33 thun tling Cole Palmer a awm a. Palmer hi EPL goal 50 zetah a inrawlh thung a, EPL goal a inrawlh tam ber a ni ve thung.
Chelsea player pawimawh Cole Palmer hian EPL-ah penalty atangin goal 12 a thun tling tawh a, EPL-ah bik City tan penalty 100% pek goal vek awmchhun a ni a, Yaya Toure record a khum.
Pathianni zan khan Tottenham chuan an mikhual Chelsea lakah 2-0 a hmahruai hmasa zet chungin tlawm zawkah an tang. Tottenham hi 2-0-a hma an hruai tawhna vawi 11 zetah tlawm zawkah an tang a. Tottenham hi EPL chanchinah 2-0 a hmahruai tawh chunga tlawm ngun ber an ni.
Pathianni zanah Brighton nen 2-2 a an inhnehtawk tumin Leicester City tan Jammie Vardy chuan goal khat a thun. Foxes player ropui Vardy hi kum 37 leh ni 332 a upa a ni a, EPL a goal thun thei upa ber dawttu a ni. EPL-a goal thun thei upa ber chu Manchester United player ropui Ryan Giggs niin kum 38 leh ni 22-a upa a nih laiin goal a thun.
Corner a hlauhawm Arsenal an hlauhawm chhunzawm zel. Gunners hian Pathianni zana an khingpui Fulham laka an si phurh sut Corner atangin an sut a, he goal hi William Saliba tauh luh a ni. Arsenal hian kum 2024 chhungin corner atangin goal 14 ngawt an thun tling tawh a. EPL-ah kum khat chhungin corner atanga goal thun tam ber record an nihrual.
Spanish La Liga
Inrinni zanah si thum fai ngawta Girona an hneh tumin Real Madrid forward Kylian Mbappe chuan goal a thun. Mbappe hian club tan goal 200 a thun tling chiah a, goal thun lamah mel lung thar a phun. Mbappe hian PSG tan goal 175 thunin, PSG tana goal thun hnem ber a ni a, a club hmasa ber Monaco tan goal 16 a thun bakah a khelh mekna Real Madrid tan goal 9 a thun tling tawh bawk.
Season tharah bul tan tha lo mah se Real Madrid tan Jude Bellingham a vul thar leh tawh. Bellingham hian La Liga an khelh hnuhnung vawi ngaah goal a thun vek a, hei hi season khatah league-a goal nga a thun zawn hmasak ber tum a ni.
Hmahruaitu La Liga chuan beisei an phak lo va, Real Betis nen an inhnehtawk ringawt. Real Betis laka an chak zawh loh hi season kal mekah Lamine Yamal-a’n bul a tanna inkhela an chak zawh lohna hmasa ber a ni.
FC Barcelona tan hian Poland forward Robert Lewandoski a khel tha viau a, season thar La Liga game hmasa 16-ah goal 16 zet a thun a. Lionel Messi hnu lamah La Liga game hmasa 16-a goal 16 thun leh thei hmasa ber a ni.
Italian Serie A
Season kal mekah beisei phak bakin Atalanta an khel tha a, vawi kua ngawt an chak zawn tawh. Atalanta hian Serie A-a an chak zawn rei ber 2020-a vawi kua an chak zawn record an nihrual der tawh.
Atalanta tan hian Charles De Ketelaere a chetha viau a, goal 15 a thun bakah assist vawi 15 a nei tling der tawh a. Europe a league lian zual pangaah hethiang ti thei pathum chauh an awm a, chungte chu Mohamed Salah, Cole Palmer leh Charles De Ketelaere te hi an ni.
Lionel Messi
Footballer ropui Lionel Messi a ropui nawn leh a, MLS 2024-ah player tha berah thlan niin, Landon Donovan MVP Award a dawng. Messi hian MLS regular season-ah vawi 19 a khel a, goal 20 a thun bakah assist vawi 16 zet a nei bawk.
Kar tawp football hnuhma
Get real time updates directly on you device, subscribe now.