Kar tawp football hnuhma

Kar tawp khan Tualchhung League hrang hrang khelh chhunzawm a ni a, inkhel hmuhnawm tak tak a awm a, rin lawk loh result eng emawzat a awm bawk. Kar tawp football-ah hnuhma thar hmuh tur a awm leh nual a. Kar tawp football hnuhma langsar zual kan hrut kual leh ang.
English Premier League
Pathianni zana Manchester Derby-ah Manchester United chuan Etihad Stadium-ah mak, mawi leh ropui takin mualneitu Manchester City an hneh a, point thum hlu tak an hmu. United manager thar Ruben Amorim kha United manager zingah EPL-ah bik Manchester derby an hmachhawn vawi khatnaah hnehna chang thei hmasa ber a ni. Manager ropui Six Alex Ferguson khan Manchester derby a hmachhawn hmasak berah hnehna a chang nghal a, hei hi chu FA Cup-ah a ni thung.
Amorim hian Pep Guardiola a ngam hranpa ve hrim hrim. November ni 5-ah Sportin Lisbon a enkawl lai khan City hi 4-1 ngawtin an lo hneh tawh a. EPL-ah United a chakpui leh bawk a. Amorim hi Pep Guardiola enkawl team lakah team hran pahnih chakpui thei hmasa ber a ni.
United laka tlawm City hi an khel chhe tluang viau a, in elna hrang hranga an khelh hnuhnung vawi 11-ah vawi khat chauh hnehna changin November 2003 – February 2004 hnu lamah an khelh chhiat zawn ber tum a ni.
Manchester United hian EPL season kal mekah corner atangin goal vawi riat ngawt an chhuah tawh a, corner atanga goal chhuah tam ber dawttu niin an chungah hian goal riat chhuah tawh Wolves an awm.
United captain Bruno Fernandes chuan EPL-ah penalty atangin goal 21 a thun tling ta a, penalty atanga goal thun tam lamah Wayne Rooney chu goal khatin a tlan pel.
United laka City hmahruaina goal thuntu Josko Gvardiol hian season kal mekah goal li a thun tawh a, defender zingah goal thun hnem ber ni mek.
Inrinni zanah an mikhual Fulham nen 2-2 a an inhnehtawk tumin Mohamed Salah chuan assist a nei a, Salah hian Liverpool tan inelna hrang hrangah assist vawi 100 a nei tling ta chiah.
5-0 ngawta Southampton an sawp tumin Tottenham tan Son Heung-min chuan assist a nei a, Son hian EPL-ah assist vawi 68 nei tling chiahin Spurs tan EPL a assist nei hnem ber Darren Anderton record a nih rual.
Season kal mekah vawi 16 an khelh tawh atangin Wolves chuan goal 40 lai chhuah tawhin point 9 chiah an hmu a, hei hi EPL a bul an tan chhiat ber tum a ni.
Spanish La Liga
Hmahruaitu FC Barcelona chu mak tak maiin an mikhual Leganes lakah an tlawm, Leganes laka an tlawm hi Lamine Yamal-a’n bul a tannaa an tlawm vawi khatna a ni. Catalan club lian Barca hi an mualah an tlawm zawn hei hi April 2022 hnu lamah an muala an tlawm zawn vawi khatna a ni a. Kum zabi 21-naah an muala an tlawm zawn vawi thumna chauh a ni nghe nghe.
Leganes hian January 20, 2019-ah Barcelona muala goal an thun hnuin an thun thei lo vang vanga ni 2156 hnu zetah Barca mualah goal an thun ve leh ta nawlh a. An goal thun chhun hmangin hnehna an chang zui bawk an goal thun hi a hlu leh zual hle ngei ang.
Inelna hrang hrangah Atletico Madrid an chetha tluang viau a, vawi 11 zet an chak zawn tawh. Vawi 11 an chak zawn hi an chak zawn rei ber dawttu a ni a, an chak zawn rei ber chu Aug.-Oct. 2012-ah vawi 13 an chak zawn kha a ni. Atletico Madrid hian kar tawpa an hneh tak Getafe kha an ngam ve hranpa reng reng a. Inelna hrang hranga an inhmachhawn hnuhnung vawi 26-ah tlawm an nei miah lo. Vawi 21 an hneh a, vawi nga dang an inhnehtawk.
Italian Serie A
Season kal mekah Atalanta an khel tha viau a, Serie A-ah vawi 10 an chak zawn der tawh. Vawi 10 an chak zawn hi Serie A-a an chak zawn rei ber tum a ni hial nghe nghe.
Atalanta an khelh that viau laiin Juventus erawh an chetha tluang hleithei lo thung. Juventus hian season kal mekah vawi 16 khelin vawi tuk chiah hnehna an chang a. 1998/99 season hnu lamah khelh 16 atanga hnehna an chan tlem ber tum a ni.
An muala an khelh hnuhnung vawi li-ah AC Milan in goal an thun miah lova, anni pawh an chetha bik lo rih hle.
German Bundesliga
Vawi 13 zet chak tluang tawh Bayern Munich chu Mainz in inrinni zan khan 2-1 in an lo hneh keuh a, an chak tluang lai an tihtawpsak. Bayern Munich hian tunhnaiah Mainz an ngam lo viau a, season nga chhungin Mainz mualah hian vawi li ngawt tlawmin, season nga chhunga an ngam loh ber chu Mainz hi an ni.
Giovanni Reyna chuan Bundesliga-ah goal 14 a thun tling ta a, American zingah Borussia Dortmund tana goal thun hnem ber ni thin Christian Pulisic (13) record a khum.
French Ligue 1
Season kal mekah Lille an khel tha tluang viau a, tlawm nei lovin khelh 16 zet an kal tluang tawh. Lille hi October 1973 – March 1974 chhung khan khelh 17 chhung tlawm nei lovin an lo kal tluang tawh a. An club record nih rual turin match khat chiah an mamawh tawh a, club record thar siam thei dinhmunah an ding mek bawk.