Kar tawp football hnuhma

International break a awm hnuin kar inrinni leh pathianni khan tualchhung league hrang hrang khelh chhunzawm leh a ni a, England lamah chuan FA Cup quarter-final khelh a ni ve thung. Kar tawp football hnuhma thar hmuh tur a awm leh nual a, Kar tawpa football hnuhma thar langsar zual kan hrui kual leh thuak thuak ang.
FA Cup
Pathianni zan khan Manchester United chuan si an phurh hmasak zet hnuin AFC Bournemouth chu 2-1 in an lehthal a, semi-final an lut. Manchester City hi FA Cup-ah a zawnin vawi sarih semi-final an lut a. English club zingah a zawna FA Cup semi-final lut ngun ber an ni. Manchester City hian FA Cup semi-final vawi 20 an luhna a ni a, Kum 2016-17-ah Etihad Stadium-a a input luh hnuin Pep Guardiola chuan FA Cup semi-final vawi riat zet a hruai thleng tawh a. 2016-17 hnu lamah FA Cup-a semi-final lut ngun ber an ni.
EPL a champion lai Manchester City hi season kal mekah an khel tha lo viau a, season kal meka inelna hrang hrangah vawi 21 zet goal an chhah hmasa tawh. Premier League club zingah an mahni aia goal chhuah hmasa tam zawk chu Leicester City (25), Manchester Utd (22) leh Southampton (22) te chiah an ni.
Manchester United atanga Aston Villa-ah loan a khel mek Marcus Rashford chuan Pathianni zan khan a club thar tan a vawi khat nan goal a thun a, Preston North End an hneh tumin goal hnih a thun nghe nghe. Hei hi December 2024-ah Everton laka goal hnih a thun hnua match khatah goal hnih a thun leh hmasak ber a ni tel bawk.
City in Bournemouth an hneh tumin Erling Haaland chuan goal khat a thun. Haaland hian FA Cup bikah season hnuhnung pathuma goal thun hnem ber ni thin Bruno Fernandes (8) goal thun zat a khum a, goal thun hnem ber a ni thar.
Crystal Palace chuan FA Cup semifinal an lut nawlh a. hei hi season 10 chhunga FA Cup semi-final an luh vawi thumna a ni a. Season 10 chhung hian an mahni aia semi-final lut tamte chu Manchester City (7), Chelsea (6) leh Manchester United (5) te chiah an ni.
Spanish La Liga
Pathianni zan khan table-a hmahruai mektu FC Barcelona chuan an mikhual Girona chu 4-1 in an hneh. Barca hi La Liga-ah vawi riat an chak zawn ta chiah a. May-september 2024 hnu lamah La Liga-a an chak zawn rei ber tum a ni.
Barca hian season kal meka an hmahruaina goal 13 zet hi set piece atanga an thun a ni a. La Liga-ah set piece atanga hmahruaina goal thun hnem ber an ni a. An hnuai chiahah hian Villarreal leh Athletic (11 ve ve) te an awm.
Barcelona forward pawimawh Robert Lewandowski chuan season kal meka inelna hrang hrangah goal 38 lai a thun tling tawh a, Top 5 European league player zingah inelna hrang hranga goal thun hnem ber a ni mek. Lewandoski hian La Liga-ah goal 25 a thun tling tawh a, amah hnaih bertu Kylian Mbappe aiin goal thumin a thun tam zawk mek. Europe a league lian zual zingah season kal meka goal thun hnem ber dawttu niin Lewandoski chungah hian Mohamed Salah (27) chiah a awm rih.
Real Madrid player pawimawh Kylian Mbappe chuan inelna hrang hrangah goal 33 a thun tling der tawh a. Real Madrid tan season khatnaa goal thun tam lamah Rudd van Nistelrooy leh Cristiano Ronaldo te goal thun zat a tluk der tawh a. Record thar siam theihna hun tha tak a nei mek bawk.
Real Madrid tan Luka Modric chuan La Liga-ah game 387 a khel tiling ta chiah a, Real Madrid captain hlui Marcelo khelh zat a tluk chiah a. Modric hian Real Madrid tan inelna hrang hrangah vawi 580 a khel tling chiah bawk a. Real Madrid tana khel hnem pakuana a ni mek. Real hi season kal mekah hnufual zawk an nih hnuin vawi li ngawt an chak let tawh a. Season kal meka chak let tam ber a ni mek.
France player pawimawih Antoine Griezmann chuan La Liga-ah vawi 521 a khel tling ta chiah a. Spanish player ni lo zing La Liga khel hnem ber ni thin Lionel Messi record game 520 a khum a, record thar duhawm tak a siam.
Atletico Madrid tan Cesar Azpilicueta chuan La Liga-ah a vawi khat nan goal a thun ve ta nge nge. Kum 35 leh ni 213-a upa Cesar Azpilicueta hi Atlético Madrid tan La Liga goal khatna thun zinga upa ber a ni. La Liga-ah hian an goal hmasa ber thun zinga upa ber chu Edinson Cavani (35 years, 243 days) a ni.
Antony khelhah Real Betis chu La Liga-ah vawi ruk ngawt an chak zawn ta der a. Hei hi manager Manuel Pellegrini hnu lama an chak zawn rei ber tum a mi nghe nghe.
Italian Serie A
Nipuia bazarah Juventus atanga Fiorentina zawmtu Moise Kean chuan season kal meka inelna hrang hrangah goal 21 a thun tling tawh a. Hei hi season khata inelna hrang hrangah goal a thun tam ber tum a ni.
German Bundesliga
Bayern Munich tan Harry Kane a chetha tluan zel a, Kane hian season kal meka inelna hrang hrangah goal 33 a thun tling der tawh. England captain Kane hi season kal meka Europe league lian zual pangaa player zingah goal thun tam ber dawttu a ni a. A chunga hian FC Barcelona goal thun khawl Robert Lewandowski a awm.
Harry Kane hian Bundesliga season kal mekah goal 22 a thun tawh. Goal 22 lai thun tawh mah se game nga chhung zet chu goal a thun thei lo zawn ve teh tlat a. Hei hi 2023-24-ah Bayern a zawm hnua goal a thun theih loh zawn rei ber a ni hial a ni. Kane hian Bundesliga club 19 zet lakah goal a thun tawh a, Bundesliga club hrang hrang laka goal thun hnem ber Miroslav Klose (28) chiah a chungah an awm.
French Ligue 1
Paris Sr-Germain an khel tha tluang tak zet a, Ligue 1-ah bik tlawm nei lovin khelh 38 chhung zet an kaltluang tawh. PSG hian Europe’s top five leagues-ah tlawm nei lova kal tluang ber lama AC Milan record an tluk hia tawh a ni.
PSG tan hian kum 19 leh ni 299 a upa Désiré Doué a chetha viau a, season kal meka inelna hrang hranga goal 20 zetah a inrawlh tling tawh. Doue hi Kylian Mbappe hnu lamah PSG tana goal a inrawlh tam zinga nuapang ber a ni. Amah aia naupang Kylian Mbappe hi inelna hrang hranga goal 20-a a inrawlh tlin tumin kum 18 leh ni 361 a upa a ni.