Kar tawp khan Europe-a tualchhung league hrang hrang khelh chhunzawm a ni a, French Ligue -ah chuan champion lai Paris St-Germain an champion nawn leh der tawh. La Liga-ah Barcelona leh Real Madrid te champion tumin an inum nasa hle a. Hetihlai hian EPL hmahruaitu Liverpool chu Fulham hneh lovin an lo tlawm ve thung. Kar tawp football a hnuhma langsar zual kan hrut kual leh thuak thuak ang.
English Premier League
Pathianni zan khan Old Trafford-ah Manchester derby khelh a ni a, United leh City te goal awm lovin an inhnehtawk. City lakah chak zo lo mah se United captain Bruno Fernandes chuan goal thun theihna hun tha a siam chhuak a, Fernandes hian season lak mekah goal thun theihna hun tha vawi 75 siam tawh in, EPL-ah chance siam hnem ber a ni.
City nen an inhnehtawk tum hian United midfielder Casemiro chuan tackle vawi 11 zet a nei a. United tan City laka tackle ngah ber niin. United tan game khata table ngah zual Owen Hargreaves leh Patrice Evra te record a nih rual.
Pathianni zana Tottenham hneh lova an tlawm leh tak vangin Southampton chu EPL atangin an tlahniam a. Southampton hi game sarih khelh hmabak la nei chungin an tla a, EPL khel tawh zawng zawngah tlahniam chiang hma ber niin record duhawm lo lam an siam.
Inrinni zan khan hmahruaitu Liverpool chu Fulham lakah 3-2 in an tlawm a, khelh 26 chhung tlawm nei lova an kaltluang lai a tawp. Liverpool hian October 2020 hnu lamah a vawi khat nan chawlhlawk hmain goal thum an chhuah. October 202 khan Aston Villa lakah 7-2 in an tlawm a, hemi tum hian chawlhlawk hmain goal 4 ngawt an chhuah hman.
Spanish La Liga
Inrinni zan khan Real Madrid chu an mikhual Valencia lakah an tlawm. Real Madrid hian an mualah shot vawi 21 zet an nei a, January 2019 hnu lamah shot he tiang zat nei chungin an la tlawm ngai miah lova, Valencia lakah a vawi khat nan an tlawm ta a ni.
Valencia laka an tlawm tum hian Vinicius Junior chuan goal khat a thun a, penalty vawi khat a thelh bawk. Vinicius Junior hian Valencia a hmachhawn tawh vawi 13 atangin goal 9 ngawt a thun a. Inelna hrang hrangah Valencia lakah amah aia goal thun thei an awm lo. Brazil forward Vinicius Junior hian Real Madrid tan inelna hrang hrangah goal 104 a thun tling tawh a, Brazil player zingah Real Madrid tana goal thun hnem ber Ronaldo Nazario goal thun zat a nih rual.
Inrinni zan khan La Liga club lian pahnih Real Madrid leh Barcelona te an mualah an chak zo lo ve ve a, hei hi September 29, 2018 hnu lamah a thlen vawi khatna a ni. Barcelona hi an mualah chak zo lo mah se inelna hrang hrangah khelh 22 chhung tlawm nei lovin an kaltluang ta chiah a, May 2019 hnu lamah tlawm nei lova an kal tluan rei ber tum a ni.
Atletico Madrid chuan season kal mekah minute 90 hnu lamah chakna goal vawi nga a an thun tawh a, La Liga-ah minute 90 hnu lama chakna goal thun hnem ber an ni.
Italian Serie A
Roma an chetha tluang zel a, Serie A-ah tlawm nei lovin khelh 15 an kaltluang ta chiah. An khelh hnuhnung vawi 15 atangin vawi 11 an chak a, draw vawi 4 an nei a, January 2016 hnu lamah Serie A-ah bik tlawm nei lova an kal tluan rei ber tum a ni a. Hemi tuma an record hi game hnihin an la phak lo.
Season kal mekah Fiorentina forward Moise Kean a chetha viau a, goal 22 a thun tling der tawh. EPL club liante pawhin an ngaihven Kean hi Alberto Gilardino (2008-09, -25 goals in 46 appearances) hnu lamah Fiorentina tan goal thun hnem ber a ni.
German Bundesliga
Bayern Munich player ropui Thomas Muller chuan season tawp hunah Bayern a chhuahsan ve tawh dawn. Muller hian Bayern tan assist vawi 221 zet a nei tawh. Muller hi Bayern tan inelna hrang hranga khel hnem ber niin vawi 743 a khel tawh a, goal 247 thunin Bayern tan goal thun hnem pathumna a ni bawk.
Bayern Munich tan Harry Kane a khel tha tluang hle a, England captain hian season kal meka inelna hrang hrangah goal 34 a thun tling tawh a. Season kal meka Europe’s Top 5 League-a goal thun hnem ber dawttu a ni mek a, a chungah hian Barcelona tana goal 38 thun tawh Robert Lewandowski a awm. Kane hian Bayern tan vawi 84 a khel tawh a, goal 78 thunin assist vawi 22 a nei tawh a, goal 100 a thawkchhuak tling der tawh.
Bayern Munich player pawimawh pakhat Jamal Musiala chuan Bundesliga-ah goal 45 a thun tling tawh a, kum 23 tlin hmain amah aia Bundesliga-ah Bayern tan goal thun tam pahnih chauh an awm a. Chungte chu Gerd Müller (79) leh Uli Hoeness (59) te an ni.
French Ligue 1
An mualah an chak vangin Paris St-Germain chu an champion nawn leh a, season hnuhnung pasarihah vawi ruk an champion na a ni. PSG hi tlawm nei lovin an kaltluang mek a, PSG hi league lian zual; England, France, Germany, Italy, Spain, Netherlands leh Portugal a league khelte zingah season kal meka tlawm nei lo awmchhun an ni.
Messi & Ronaldo
Lionel Messi chuan MSL-a Totronto an hmachhawnah a vawi khat nan goal a thun. Messi hian MLS team 19 a hmachhawn tawh zinga team 13-ah goal thun tawh. Mesii hian Inter Miami tan game 19 chauh a la khel an club tana goal contribution ngah ber Gonzalo Higuaín a khum der tawh bawk.
Cristiano Ronaldo chu Al-Nassr tan a chetha chhunzawm zel a, season kal mekah game khata goal hnih chin thunna vawi nga a nei tawh. Saudi Pro-League season kal mekah goal 21 thunin top-scorer a ni mek nghe nghe. Ronaldo hian season 15 chhung zet chu League-ah goal 20 chin a thun hial tawh nghe nghe.
Kar tawp football hnuhma
Get real time updates directly on you device, subscribe now.
Next Post