Kar tawp football hnuhma

Chawlhkar tawp khan Europe a tualchhung league lian zual pangate khelh chhunzawm a ni a, inkhel hmuhnawm tak tak hmuh tur a awm teuh a, mit a tlat leh pek hle. Inrinni zanah EPL leh La Liga hmahruaitu ve ve an tlawm. Kar tawp football hnuhma langsar zual kan tarlang leh ang.
English Premier League
Inrinni zan khan minute 90 leh a hnu lamah goal 8 ngawt a lut a, hei hi English Premier League chanchinah inrinni zana minute 90 leh a hnu lama goal a luh tam ber tum a ni.
Inrinni zanah EPL champion lai leh season thara lak chak vek Liverpool chu Crystal Palace hneh lovin an tlawm. Reds hi EPL-ah game 10 chhung tlawm nei lova an hmachhawn tawh Crystal Palace lakah an tlawm ve ta tlat a. EPL club lakah tlawm nei lova an kal tluan rei ber a tawp fel.
Liverpool hnehtu Crystal Palace hi EPL season kal mekah tlawm nei lo awmchhun an ni ta a, kum 1990-91 hnu lamah EPL season thara game ruk an khelh hmasaka tlawm an neih loh vawi khatna a ni. Eagles hi season liam ta tawp dawn hnaih lam atang khan an khel tha tluang a, season hlui leh tharah game 12 an hmachhawnah tlawm an la nei miah lo.
Reuben Amorim hnuaiah Manchester United an khel chhe zel a, inrinni zana an khingpui Brentford lakah 3-1 in an tlawm. Amorim hian United a enkawl hnuin vawi khatmah a la chak zawnpui miah lo. United hi EPL-ah bim Mimualah game sarih chhung hnehna an chang tei lo zawn tawh a. A club chanchinah Mimuala an chak loh rei tum hnihna a ni a, an chak loh zawn rei ber chu vawi 8 an chak loh zawn tum a ni.
Manchester City tan Erling Haaland a khel tha tluang zel a, EPL-ah vawi ruk khelin goal 8 a thun tling leh der tawh. Haaland hi season tharah Europe-a league lian zual panga zingah goal thun tam pahnihna a, Mbappe nen goal 8 ve ve an thun a, an chungah hian goal 10 thun tling tawh Harry Kane a awm.
Pathianni zan khan Arsenal chuan Newcastle United lehthalin hnehna pawimawh tak an chang. Arsenal hi hun tawp dawn hnaih minute 10 la awm chunga hnufual zawk an nihnaah vawi hnih an chak let vawi hnihna chiah a ni a. October 1999 a an lo chak let tawh angin an chak let ve leh thei chiah. Gunners hian 2023-24 atang tun thlengin ball kang atangin goal 46 zet an thun tawh a, an mahni hnaih bertu aiin goal 11 zetin an thun tam zawk.
Spanish La Liga
Inrinni zana Madrid derby hmuhnawm takah Atletico Madrid chuan an mikhual Real Madrid chu 5-2 ngawtin an hneh. Atletico Madrid hian kum 75 zet hnuah an elpui lian Real Madrid lakah goal nga an thun ve leh ta nawlh. Atletico hian tunhnaiah Real hi La Liga bikah an ngam viau a, game ruk chhung tlawm an nei tawh lo. Real Madrid hian kum 2018 khan Barcelona lakah goal 5 an chhuah a, hemi hnua goal 5 an chhuah lehna hmasak ber hun duhawm lo tak an tawng.
Real Madrid tan Kylian Mbappe a khel tha tluang viau a, France forward hian April 2025 atanga tun thlengin inelna hrang hrangah goal 21 zet a thun tling tawh.
Inelna hrang hrangah FC Barcelona an khel tha tluang a, game 44 chhung zet goal an thun tluang tawh. Barcelona hian Champions League-a an hmachhawn tur PSG lakah goal an thun thei a ni chuan 1942-44 a an club record khumi record thar an siam thei dawn.
Barcelona tan Robert Lewandoski chuan goal a thun tluang zel a, goal 105 thun tling tawhin Barca tan goal thun tam lamah 16-na an ni a, Neymar leh Evaristo te goal thun zat a tluk.
Bundesliga
Bayern Munich tan Harry Kane chuan goal a thun tluang zel. Kane hian Bayern tan inelna hrang hrangah vawi 104 khelin goal 100 a thun tling a, Bayern tan goal 100 thun tling thei 19 na a ni a. Haaland leh Cristiano Ronaldo te record khumin club tan goal 100 thun tling rang ber a ni nghal bawk.
England captain Kane hian Bundesliga-ah goal khat aia tam thunna game 19 a nei tawh a, season liam pathum chhunga game khatah goal khat aia tam thunna ngahna ber Kylian Mbappe record a tluk chiah.