HUNTRIX “Golden”-in record siamin Hot 100-ah a la No.1

On Oct 1, 2025 14 0

HUNTRIX “Golden”-in record siamin Hot 100-ah a la No.1
KPop Demon Hunters soundtrack HUNTRIX “Golden” chu Billboard Hot 100 (US singles) chart-ah a No.1 a, he chart-ah hian kar sarih a No.1 tling ta a, Hot 100 chart an tihchhuah tan atanga kum 67 chhunga he chart-a film soundtrack No.1 ni rei thei 10 zingah a tel ta a, animated movie soundtrack-ah chuan he chart-a No.1 ni rei tei ber a ni bawk.
Hetihrual hian “Golden” hian 1995-a TLC hla hit “Waterfalls” nihrualin, hmeichhe hlang group zinga he chart-a No.1 ni rei theihah pahnihna a ni ve ta a, 2000-2001 a kar 11 No.1 ni thei Destiny’s Child ‘Independent Women Part 1’ chiah a pha lo.
HUNTRIX tana aw thawhtute hi EJAE, Audrey Nuna leh REI AMI te an ni a, Korean pop nena inzawmna nei hmeichhe group zinga he chart-a No.1 thei hmasa ber an ni bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
HUNTRIX “Golden” hian kar khat chhungin stream maktaduai 33.8, radio airplay ngaithlatu maktaduai 33.9 leh sales 8,000 a la nei thei a, hei hi a kar sarih nan chart-ah a No.1 pui leh ta a ni.
Chart-a kar 10 No.1 ni thei Alex Warren “Ordinary” chu No.2-ah bawk awm lehin, KPop Demon Hunters hla dang, Saja Boys ‘Soda Pop’ chu No.5 atangin No.3-ah a insawn a, Saja Boys “Your Idol” chu No.6 atangin No.5 a kai bawk a, tihian tunkar chart top 5-ah KPop Demon Hunters-in hla pathum a nei leh a, kar li chhung hetiang hi ni tawhin, soundtrack zingah hetiang tithei awm chhun a la ni.
Chart No.1 hlui Morgan Wallen ‘What I Want” featuring Tate McRae chu No.4-ah bawk a la awm a, chart No.1 hlui bawk Sabrina Carpenter ‘Manchild’ chu No.3 atangin No.6-ah a tawlh ta bawk.
Chart No.1 hlui Teddy Swims ‘Lose Control’ chu No.9 atangin No.7 a kai thar leh ta a, he hla hi kar 110 chungin chart-ah lang tawhin, he chart-a hla lang rei thei ber record a siam a sawhnghet telh telh a, top 10-ah pawh kar 79 lang tawhin, hei pawh hi top 10-a lang rei thei record a ni bawk.
Justin Bieber ‘Daisies’ chu No.10 atangin No.8-ah a insawn leh hret a, Ravyn Lenae “Love Me Not” chu No.7 atangin No.9-ah a tawlh a, chart-a kar nga No.1 ni thei Lady Gaga leh Bruno Mars ‘Die With a Smile’ chu No.11 atangin No.10 a kai ve leh ta bawk.