Kar tawp football hnuhma langsar

Kar tawp khan tualchhung league khelh chhunzawm a ni a, inkhel hmuhnawm tak tak hmuh tur a awm. Kar tawp football hnuhma langsar kan hrut kual leh ang.
English Premier League
Club lian Manchester City, Arsenal leh Liverpool te zan khatah an tlawm rual mawh hle a, an tlawm rual hnuhnung ber chu February 2023 khan a ni a, chawlhkar 91 chhung zet tlawm rual an nei tawh lo.
Manchester City hi an tlawm zawn mawh hle. Carabao Cup-ah an tlawm hnuin EPL-ah inrinni zan khan an tlawm zui leh a, October 2023 hnuah an tlawm zawn leh hmasak ber an ni a. Hemi tum hian Wolves leh Arsenal te an hneh lo zawn. Inrinni zan khan Champion lai City hian AFC Bournemouth an hneh lo teh tlat a. Hei hi Bournemouth in EPL-ah City an hneh vawi khatna a ni.
Manager thar Arne Slot hnuaiah Liverpool an khel tha zui zel. Reds hian Slot hnuaiah EPL vawi 10 an khel tawh a, vawi riat chakin, vawi khat draw an nei a, tlawm zawkah vawi khat an tang. Arne Slot hi Liverpool manager zingah EPL match hmasa 10-a chetha ber a ni.
Liverpool in Brighton an lehthal tum hian Mohamed Salah chuan minute 74-naah chakna goal a thun. Salah hian EPL-ah goal 164 a thun tling chiah. Salah hian EPL a goal thun hnem pakuana Robbie Fowler record a khum a, EPL a goal thun tam lamah pariatna a ni.
Tottenham chuan kum 2024 chhungin an mualah goal vawi 12 zet an chhuah hmasa tawh a, heng zingah hian vawi 10 zet hnehna an chang let. Goal chhuah hmasa chunga hnehna chan let tam lamah Manchester City an nih rual.
Spanish La Liga
Season tharah Barcelona an khel tha chhunzawm zel a, pathianni zan khan an khingpui Espanyol chu 3-1 in an hneh leh. Barca hian season tharah vawi 12 khelin goal 40 an thun tling der tawh. Hei hi La Liga season thar match 12-a goal an thun tam ber dawttu a ni a, kum 1950-51 khan an match hmasa 12-ah goal 42 zet an lo thun tawh.
Barca tan hian Brazil forward Raphinha a chetha viau a, season thara inelna hrang hrangah vawi 15 khelin, goal 11 a thun tling der tawh. Season liam ta khan Raphinha hian match 37 atangin goal 10 chauh a thun.
Season thara chetha Barcelona hi an offside tam viau a, game tinah vawi 6.6 offside ang zel niin Top 5 European leagues-ah offside ngun ber an ni mek.
Cristhian Stuani chuan La Liga-ah bench atanga lut chungin goal 30 a thun tling tawh a, La Liga-ah bench atanga lut a, goal thum tam ber a ni.
Italian Serie A
Domenico Berardi chuan 2012/13 season atang a khelh tan atangin penalty vawi 48 ngawt a pet goal tawh a. Hemi chhung hian a amah aia penalty pet goal tam pahnih chiah an awm a, chungte chu Cristiano Ronaldo (63) leh Ciro Immobile (52) te an ni.
Fiorentina chuan Mimualah clean sheet vawi li an nei zawn tawh a, hei hi Serie A-ah an vawi thum neihna a ni a, September – November 2007 (5) leh March – May 1966 (4) khan Mimual-ah goal chhuah loh an lo nei zawn tawh bawk.
Argentina forward Paulo Dybala chuan Serie A-ah goal 125 a thun tling tawh a, Serie A a Gonzalo Higuaín goal thun zat nihrual in, Argentina player zingah Serie A-a goal thun tam pathumna a ni a. A chungah hian Hernán Crespo (153) leh Gabriel Batistuta (184) te an awm.
German Bundesliga
Manager thar Vincent Kompany hnuaiah Bayern Munich an khel tha viau a, match 14 atangin goal 50 an thun tling der tawh. Bayern Munich hi season tharah Europe’s five major leagues club zingah goal 50 thun tling hmasa ber an ni.
Eintracht Frankfurt tan Omar Marmoush a khel tha viau a, season tharah goal 10 a thun tling der tawh. Ani hi Eintracht Frankfurt tan match hmasa pakuaa goal 10 thun thei hmasa ber a ni.