Kar tawp football hnuhma langsar

Kar tawp khan Europe a tualchhung league lian zual pangate khelh chhunzawm a ni a, England ah FA Cup final khelh a ni bawk. Inkhel hmuhnawm tak takah hnuhma thar hmuh belh tur a awm nual a. Kar tawp football hnuhma langsar zual kan hrut kual leh ang.
FA Cup
Inrinni zan khan Wembley Stadium-ah FA Cup final khelh a ni a, Crystal Palace chuan 1-0 in Manchester City an hneh nawlh a, tui let hnua a vawi khat nan trophy lian an chawi. Crystal Palace hi kum 1861 daih tawh khan din a ni a, upa tawh viau mah se inelna lianah an la champion ngai miah lo. Final-a an hneh tak Manchester City khan FA Cup-ah an vawi hnih hnehna chauh a ni a, an hneh hmasak zawk chu kum 1921 daih tawh kha a ni a. Kum 104 hnuah hneh ve leh nawlhin trophy lak nan an hmang. Crystal Palace hi a vawi khat nan European Competition khel turin an tling nghal bawk.
FA Cup final-ah an tlawm tak vangin manager ropui Pep Guardiola chua major final-ah a vawi thum nan tlawm ni hmel a hmu. Pep Guardiola hian a team enkawl Barcelona chu Copa del Rey final-ah a tlawmpui tawh a. City hi Champions League final-ah Chelsea hneh lova a tlawmpui bakah FA Cup final-ah Palace an ngam lo leh bawk.
English Premier League
Zirtawp zan khan Manchester United chu Chelsea hneh lovin an tlawm. United hi EPL an khel hnuhnung pariatah chak an nei miah lova, EPL-ah an chak loh zawn rei ber record a ni hial. Hetihlai hian United hnehtu Chelsea hi kum 2025 chhung bikah Stamford Brigde-ah vawi 10 ngawt tlawm an nei lo zawn tawh a, calender year-ah an muala an tlawm loh rei ber tum a ni ve thung.
Zirtawp zan vek hian Tottenham Hotspurs chu Aston Villa hneh lovin an tlawm ve bawk. Tottenham hi season kal meka inelna hrang hrangah vawi 25 an tlawmna a ni a. Season khata an tlawm tam ber record, kum 1991-92 a mi an tluk a, a chhe lamin record thar siam thei dinhmunah an ding mek.
Pathianni zanah si hnih faia an mikhual Ipswich Town an hneh tumin Leicester City tan Jammie Vardy chuan hmahruaina goal a thun. Foxes chhuahsan thawh tur Vardy hian a ropuina Leicester City tan inelna hrang hrangah vawi 500 khelin goal 200 a thun tling.
Spanish La Liga
Pathianni zan khan champion thar FC Barcelona chu an mikhual Villareal hneh lovin an tlawm. An mualah an tlawm tum hian rawlthar duhawm Lamine Yamal chuan box pawn atangin goal mawi tak a thun. Kum 17 mi Yamal hian season kal mekah box pawn atangin goal nga a thun tling tawh a. Season kal meka Europe’s top 5 league-ah box pawn atanga goal thun tam lamah Kylian Mbappé, Federico Valverde, Bruno Fernandes leh Matheus Cunha te nen an intluk tlang hlawm.
Pathianni zan hian Real Madrid chuan 2-0 in Sevilla an hneh ve thung. Real hian Sevilla an hmachhawn hnuhnung vawi 13-ah tlawm an nei lova, vawi 11 an chak laiin vawi hnih an in draw a, Sevilla lakah record duhawm tak an nei chhunzawm zel.
Champion na nei lov season hmang zo tur Real Madrid hian season kal mekah clean sheet vawi 14 an nei tawh a, La Liga-ah Atletico Madrid nen clean sheet nei hnem ber an ni mek a. Top 5 League season kal mekah an ni aia clean sheet nei hmem chu Bayern Munich, Inter Milan leh Napoli te an ni.
La Liga-ah bul tan tha tawk lo mah se Kylian Mbappe theihna tak tak a lang chho a, a vul ta hle. Mbappe hian La Liga season kal mekah goal 29 zet a thun tling tawh a, Pichichi Award dawng turin hma a hruai mek. Real Madrid player ni tawh zawng zawng zingah La Liga season khatnaa chetha zual palina a ni mek bawk.
.Italian Serie A
Kar tawp khan table chunga awm pahnih Napoli leh Inter Milan te an chak zo lo ve ve. Champion tuma inumna boruak a ngaihnawm zui zel a, zirtawp zanah champion tur tihchian a ni dawn. Table-ah point khata hmahruai mektu Napoli in zirtawp zan khian Cagliari an mikhual ang a, an chak chuan Serie A champion thar an ni ang. Zirtawpni zan vek hian Inter Milan in Como a hmachhawn ve dawn bawk. Napoli an chak lova, Como an hneh a nih chuan Inter Mila hi an champion nawn leh thung ang.
German Bundesliga
Bayer Leverkusen tan Patrik Schick a chetha chhunzawm zel a, inrinni zan khan goal hnih a thun leh. Patrik Shick hian Bundesliga season liam taah khan match li-ah goal hnih chin a thun a, match khata goal hnih chin thun tam lamah pahnihna a ni a. A chungah hian Bundesliga match 6 a goal hnih chin thun tling Harry Kane a awm.
Bundesliga season liam taah hian a vawi khat nana trophy lian chawi ve ta nawlh Harry Kane chuan goal 26 a thun a, top-scorer a ni. Kane hi a career-ah top-scorer a nih vawi ngana a ni a, Lewandoski hnu lamah Bundesliga-a top-scorer ni zawn leh thei awmchhun a ni rih bawk.
Bundesliga-ah hian Serhou Guirassy chuan goal 21 a thun nghal a. Borussia Dortmund tan Bundesliga season khatna goal 21 thun tling nghal thei awm chhun a ni a, club record thar a siam.