Karnataka sorkar in promise panga tihlawhtling

Chief Minister Siddaramaiah leh Deputy CM D.K. Shivakumar te chuan Congress tena thalai hna nei lote tana inthlana thutiam an neih pangana Yuva Nidhi scheme chu January 12 khan an tlangzarh a. Tlangzarhnaah hian cabinet minister dangte bakah Shivamogga leh thenawm district atangin thalai sang tam tak an tel a ni.
He scheme hmang hian hna la hmu lo graduate leh diploma neite chu kum hnih chhunga sum hmanga puihin an awm dawn a ni. Graduate leh diploma neite chu training pek an ni bawk ang.
Sorkar chuan degree holder te hnenah tanpuina thla tin Rs 3,000 a pe ang a, diploma holder te hnenah Rs 1,500 a pe thung ang a, kum hnih chhung a tanpui dawn a ni.
He scheme tlangzarh ni hi youth icon Swami Vivekananda piancham chiah a ni bawk a. Organisers te chuan tlangzarhnaah hian mi nuai khat dawn an tel tiin an sawi a.
Shivamogga, Davangere, Chitradurga, Chikkamagaluru, Udupi leh Haveri district a thalai tanpui turte chu an pungkhawm a ni.
Minister for Medical Education and Skill Development Sharan Prakash Patil, a Yuva Nidhi kalpui ber tur department changtu chuan he scheme hi Karnataka-a cheng graduate leh diploma holder-te chauhin an chang thei ang, a ti a.
Unemployment allowance chu hna nei lovin hna a neih hma emaw kum hnih chhung pek an ni ang, a ti a.
Apllication chu Karnataka One, Grama One, Bapuji Seva Kendra or Seva Sindhu portal ah thehluh theih a ni ang a Applicant chuan Aadhaar card, bank passbook, ration card, SSLC, PUC, degree or diploma mark sheet an thil tel ngei tur a ni bawk.
Minister chuan Yuva Nidhi scheme-ah hian thalai 70,000 dawn an inziak lut der tawh a ti bawk a. Department chuan kum hnih chhung sum faiin a tanpui ang a. Hei bakah hian department chuan thalai tena skill an neih theih nan leh India leh ram pawna thlenga hna an hmuh theih nan training a pe bawk ang.
Tlangzarhna neihah Minister for School Education Madhu Bangarappa chuan Chief Minister Siddaramaiah chu Malnad region-a loneitute, Sharavathi project atana an ram petute chu ram pe turin a ngen bawk a. Shivamogga district in-charge ni bawk chuan loneitute chuan an ram pek aiah ram dang an la nei thei lo ti bawkin hei bakah hian forest dweller te pawh ram pek ni se a ti bawk.
Hei bakah hian CM chu Shivamogga-a Freedom Park chu Allama Prabhu, kum za bi 12-naa mystic poet, Shikaripur taluk a Balligavi chhuak hming chawia thlak turin a ngen bawk.
Myusuru-ah chuan Deputy Comissioner K.V. Rajendra chuan Yuva Nidhi scheme enrolment drive a hawng thung a. Rajendra chuan allowance chu hmang tha turin a ngen a. Allowance te chu zir zawm zel nan emaw self-employment lama hmalak nana hmang turin a ngen a. |halaite chu Swami Vivekanada principles te kalpui turin a ngen bawk.
He scheme atan hian State sorkar chuan Rs 250 crore kuminah a dah hrang a, kum 2025-ah chuan Rs 1,200 crore-a pung tur leh kum 2025 atang chuan Rs 1,500 crore vel zela kum tina pung turah a hisap thung.
Hei hi May 2023-a Karnataka Assembly inthlan hmaa Congress tena five guarantee an siam an tihhlawhtlin hnuhnun ber a ni a. Congress te chuan a hmain Shakti – non-luxury government bus-a hmeichhiate a thlawna chuantir, Anna Bhagya – BPL chuhngkua te hnena 10 kg rice pek te, Gruha Jyoti – In tinah free electricity 200 units pek te, Gruha Lakshmi – APL/BPL ration card nei chhungkaw lu ber hmeichhia nihna chhungkua tana Rs 2,000 thla tin pek te chu an lo tihlawhtling vek tawh a ni.