Kashmir-ah sabereka khuangkaih thlengah mi 46 thi

Kashmir-ah sabereka khuangkaih thlengah mi 46 thi
Indian awp chin Kashmir-a Hindu biakzinte thlengtu khua chu sebereka khuangkaihin hnawlin mi 46 an thi.
Kishtwar district-a khaw kilkhawrtak, Chositi-ah Ningani chawhnu khan sabereka khuangkaih hi a thleng a. He khua hi Himalaya-a Hindu sakhaw hmun thianghlim lar tak kalkawnga awm niin biakzinten an kalpawh nasa hle.
Video thehdarhah chuan tui lian chak tak leh a ken tel hnawl hrawl tak takin lirthei a hnawl lai a lang a. Chhanchhuah hna thawktute chuan chenna in chhiaa dam chhuakte zawn hna thawk nghalin mi thenkhat chu khawlaiah an tap a, chirhin a bual khah vekte pawh an awm.
Biakzin eng emaw zat chu hmun himah lak chhuah an ni a, mi 50 vel erawh an chin hriat loh an ni a, chhanchhuah hna la thawh mek zel a ni.
Tui lian hi ruah bawhawk surin a thlen a ni tih thuneituten an sawi a. Union minister, Jammu & Kashmir MP ni bawk, Jitendra Singh chuan ‘a nasa em em’ tih sawiin rescue team tan pawh a hmun thlen mai pawh a harsa niin a sawi.
Kawngpuite pawh a hnawl chhe vek a, khaw awm danin a zir loh avangin helicopter-a thlawh ngam a ni bawk si lo niin a sawi.
Duh lo hle mah se he chhiatna thleng avanga thi hi an la pun ngei pawh a rinawm hle tih Singh-a chuan a sawi a. Chhiatna thlenna bul lawk khua, Atholi-a cheng chuan news agency AFP hnenah tual chhung damdawi inah ‘ruang 15 vel’ an la lut lai a hmuh thu a hrilh.
Biakzina kalten chhunchaw an ei nana siam vantlang choka lian tak pawh sabereka khuangkaih hian a la vek niin thuneitu pakhatin Reuters news agency a hrilh.
Jammu & Kashmir Chief Minister Omar Abdullah chuan thil thleng chu ‘lungchhiatthlak’ tia sawiin Zirtawpnia Independence Day lawmna puala hun a hman tur thenkhat chu a thulh phah nghal tih a sawi.
Chanchin thar an hriat chu ‘a rapthlak’ tih sawiin a hmun atangin thu chiang leh rintlak tak ‘an dawng muang’ tih a sawi a. Heti chung hian chhanchhuah hna thawh a khaihlak lohna turin a tul ang zawng zawng an ti tih a sawi.
Indian Prime Minister Narendra Modi-a pawhin ‘puihna awm theih ang zawng zawng’ a tul a ih chuan pek theiha a awm reng thu a sawi bawk.
India-ah hian a ram hmar lamte chuan tun hnaiah ruah an dawng tam hle a, hmun tam takah sabereka khuangkaih pawh a thleng.
Kar hmasa khan Uttarakhand-a Dharali khaw chanve dawn chu sabereka khuangkaihin hnawlin an buai hle a. Thawhlehni khan ruang pakhat hmuh belh leh a ni a, thuneitute chuan mi 66 chin an la hre thei lo tih an sawi.