Kashmir-ah zu khap duhna boruak lian

Kashmir-ah zu khap duhna boruak lian
Jammu & Kashmir-ah chuan zu khap chungchangah politics-a titi lian tak a awm thar leh mek a, kum 2016 khan inhnialna lian tak awm tawhin Mehbooba Mufti-i kaihhruai People’s Democratic Party (PDP)-in a lo kaltlangpui lo tawh a, tunah hian khap duh leh duh lo inhnialna a awm thar leh mek.
Tun tumah hian khap duhna aupui nasa ber chu PDP an ni ta thung a. Signature campaign kalpuiin rorel lai, National Conference chuan pawnlanga that tumna maiah a puh let.
Kartawpah khan Srinagar-ah chuan khap duh lantirna poster tam tak tar niin khualzinte pawh ‘tual chhung mite nunphung leh tih dan zahsak’ turin an ngen nghal a. Police chuan poster-te hi an pawt thla a, eptute hian hei hi an sawisel zui leh bawk.
March 3 atanga tan tur assembly-a budget session-ah pawh hei hi sawiho tur lian ber a nih rin a ni a. PDP leh National Conference atanga MLA pakhat ve vein khap tura tihna bill an thehlut tawh.
PDP atang hian Fayaz Ahamd Mir, National Conference atangin Ahsan Pardesi leh Awami Ittehad Party (AIP) atangin Sheikh Khursheed Ahmad ten a hran theuhvin union territory-a zu khap tura tihna dan siam turin bill an pu lut dawn.
Pathianni khan PDP hruaitu, chief minister hlui ni bawk, Mufti-i chuan a fanu, Iltija Mufti-i’n Inrinni atanga signature campaign a huaihawt chu a zawm ve.
Zirtawpniah khan Srinagar-a hmun lar tak, Lal Chowk-a sumdawngte chuan poster tarin anmahni tlawhtu khualzinte chu, “Hun hlimawm leh hriat reng tur hmang turin kan duhsak cheu va, hei hi kan ngen bawk a che u: I chhungte hmangaih la, zu in lo la, ruihhlo ti lo bawk la, kawngah chil chhak lovin zial zu lo bawk rawh. Kan nun phung leh zia hi min zahsak dawn nia,” an ti.
National Conference MLA Pardesi-a chuan bill a put luh chhan sawiin zalen taka zu zawrh hi sakhaw dan kalh a ni a, Kashmir nunphung a ni lo bawk niin a sawi.
“Kan nun phung hi ruihhlo tel lo a ni a, he bill hi chumi vawn himna tur pakhat a ni,” a ti.
Kashmir hi khualzina innghat thuk tak an ni a, mi dawnsawn pawh an thiam hle a. Zu dawr an neih hmasak ber chu British hun lai daih tawha hawn kha niin hemi hnuah hian Kashmir-ah hian a dawr a awm reng a; mahse, kum 1990 chhova Islamist firfiak pawl an tam tak hnuah anni hian zawrh an khap zui.