Leiverh chima tangte dam beiseina a tlem
Leiverh chima tangte dam beiseina a tlem
Telangana Minister J Krishna Rao chuan Inrinnia leiverh chima tang hnathawktu pariatte dinhmun chu hriat a la har hle tih a sawi a, an dam chhuah theih pawh ‘beiseina a sang viau thei rih lo’ tih a sawi.
Telangana sorkar hian Indian Army, NDRF leh agency dangte chu chhanchhuah hna an thawh mekah na takin a nawr a. Hetih lai hian SLBC hna thawh meka chhiatna thlengah hian hlawhtlinna sawi tham a la awm rih lo zel.
“Leiverh chhungah hian chirh leh lei a intiang sang lutuk a, kaltlang a harsa hle a. Chhanchhuah hna thawktute hian rubber tube leh thing hmangin kaltlang theih dan tur an dap mek a ni,” tiin a chhunga kal, Rao-a chuan thuthar lakhawmtute a hrilh.
Tang mekte dam theihna chance pawh a chhe rih hle tih a sawi bawk.
“Kan sawi thei lo, beisei kan nei a, hetiang thil thleng hi chu a serious em a, sawi theih a tam rih lo. An dam chhuak ang em tih pawh sawi lawk theih a ni lo va, an chance neih pawh a tha lo hle,” a ti.
State sorkarin video a tihchhuahah chuan chhanchhuah hna thawktute hian chirh chhah tak tihtlang tumin an bei mek a, thir tlawn leh cement tlang lian tak tak pawh a awm a ni.
State sorkar hian Inrinni tuka a chim lai khan a chhungah hna thawk mi 70 an awm tih thuthar lakhawmtute hnenah an sawi a. A tam zawk hi a chhunga inkalpawhna atana an siam rel hmangin an chhuak thei tih an sawi.
Sorkar hian metre 200 huam chin leiverh hi a chim niin an sawi a, a tawp lamah tui leh chirh chhah tak a awm niin an sawi.
Minister Uttam Kumar Reddy chuan hmanraw lian zawk chah luhna turin a hmunhma a rualrem loh em avangin a hautak hle tih a sawi.
Pathianni tukah khan chhanchhuah hna thawktute zinga thenkhat, a luh theihna tawp thlengte chuan tang mekte hi an ko va, chhanna an dawng lo niin PTI chuan a tar lang.
Chhiatna thlenna, Nagarkurnool District Collector B Santhosh chuan tangte hi an la bepawp thei rih lo zel tih PTI a hrilh bawk.
Thawk mekte pawhin an hmaa hna chu a hautak hle tih an sawi a. “Km 13.5-a thuk thlen hma km hnih velah tui a tling a. Hei hi a huphurhawm khawp mai a, hei vang hian khawl lian pawh a luh thuk theih loh phah a. Tui hi paih kang a nih hunah chauh luh thuk lehzual theih a ni dawn a ni,” an ti.