Kashmir beih hnuah India-Pakistan cricket match en tur awm dawn rih lo
India men’s coach Gautam Gambhir chuan tunhnaia firfiakte’n Kashmir phaizawla mi an thah chiam hnuah India leh Pakistan inkara cricket match khelh a nih tawh rih loh tur thu a sawichhuak.
Kan hriat angin, thla hmasa mai khan Pakistan thlawp Muslim firfiakte’n India awp chin Kashmir phaizawl bei thutin, khualzin mi 26 zet an tihlum a; kha thilah khan India leh khawvel chuan Pakistan chu mawhphurtuah puhin, Pakistan hian a pha thung a, ramria ram pahnih inbeihna erawh a chhuah phah zui ta tho a ni.
Ram pahnih hi British awpna atanga an indan phat atangin an innghirngho nghal a, chuti chungin khawvel huap cricket inelnaah erawh khelmual pakhat an luah dun lo thei lo a, kumin kum tawp lam hian Women’s World Cup-a inlan ve ve tur an ni nghe nghe.
Tunhnaia media lamin ram pahnih inkara cricket match khelh zui zel a nih dawn leh dawn loh an zawhnaah India mipa coach Gambhir chuan tun buaina hi a kian fel hma loh chuan India leh Pakistan inkarah eng match mah khelh a nih loh tur thu a sawi.
He thu hi India sipaite’n Pakistan ram chhung leh Pakistan awp chin Kashmir lama beihpui (airstrike) an thlak hma chiah Thawhlehnia a sawi kha a ni.
India leh Pakistan inhmachhawn hnuhnunber chu kumin February thla mai Champions Trophy kha niin, tournament khel tura Pakistan rama luh India-in a hnial avangin Dubai lamah kha match kha an khel ta nghe nghe a ni.
India mipa cricket team coach Gambhir hian ram tan Test vawi 58, one-day international tum 147 leh T20 match 37 a khel tling.
Kashmir beih hnuah India-Pakistan cricket match en tur awm dawn rih lo
Get real time updates directly on you device, subscribe now.
Prev Post